മരിച്ചെന്ന് വിധിയെഴുതി ഡോക്ടറും ബന്ധുക്കളും: ചിതയില്‍ വയ്ക്കുന്നതിന് തൊട്ടുമുമ്പ് കണ്ണ് തുറന്ന് 62കാരന്‍

ദില്ലി: ഡോക്ടമാര്‍ മരിച്ചെന്ന് കരുതിയ വയോധികൻ സംസ്‌കാരത്തിന് തൊട്ടുമുമ്പ് കണ്ണ് തുറന്നു. ദില്ലി നരേലയില്‍ തിക്രി ഖുര്‍ദ് ഗ്രാമത്തിലെ സതീശ് ഭരദ്വാജ് ആണ് ചിതയില്‍ വയ്ക്കുന്നതിന് തൊട്ടുമുമ്പ് കണ്ണ് തുറന്നത്.

62 കാരനായ സതീശ് ഏറെ നാളുകളായി ക്യാന്‍സര്‍ ബാധിച്ച് ആശുപത്രിയില്‍ ചികിത്സയില്‍ കഴിയുകയായിരുന്നു. വെന്റിലേറ്ററില്‍ ഗുരുതരാവസ്ഥയില്‍ കഴിയുന്നതിനിടെയാണ് ഇയാള്‍ മരിച്ചുവെന്ന് ഡോക്ടര്‍മാര്‍ സ്ഥിരീകരിച്ചത്.

ഇതേതുടർന്ന് അന്ത്യകർമ്മങ്ങൾക്കായി ശ്മശാനത്തിലേക്ക് കൊണ്ടുപോയി. അന്ത്യകര്‍മ്മങ്ങള്‍ക്കായി തീ കത്തിക്കുന്നതിന് മുമ്പ് മുഖത്ത് ഇട്ടിരുന്ന തുണി മാറ്റിയപ്പോഴാണ് മൃതദേഹത്തിന് ജീവനുണ്ടെന്ന് കണ്ടെത്തിയത്. പിന്നാലെ സതീശ് കണ്ണ് തുറക്കുകയും ശ്വാസം വലിക്കാൻ തുടങ്ങുകയും ചെയ്തു. സതീശിന് ജീവനുണ്ടെന്ന് മനസിലാക്കിയതോടെ ആംബുലന്‍സ് വിളിച്ച് ആശുപത്രിയിലെത്തിച്ചു.