കൊല്ലത്ത് വയോധികൻ കാറിടിച്ച് മരിച്ചത് അപകടമല്ല ! ലക്ഷങ്ങള്‍ അടിച്ചുമാറ്റിയത് ചോദിച്ചെത്തിയപ്പോള്‍ ക്വട്ടേഷന്‍ ; പാപ്പച്ചനെ കൊന്നുതള്ളി വനിതാ ബാങ്ക് മാനേജർ

കൊല്ലത്ത് കാറിടിച്ച് സൈക്കിൾ യാത്രക്കാരൻ മരിച്ചത് കൊലപാതകമെന്നു പൊലീസ്. സ്വകാര്യ ബാങ്കിലെ വനിത മാനേജരായ സരിതയാണ് പണം തട്ടിയെടുക്കാൻ ക്വട്ടേഷൻ നൽകിയത്. സരിതയും ക്വട്ടേഷൻ‌ ഏറ്റെടുത്ത അനിമോനും പോലീസിന്റെ കസ്റ്റഡിയിലാണ്. കൊല്ലം ആശ്രാമം മൈതാനത്തിനു തൊട്ടടുത്ത ഇടവഴിയിൽ അനിമോൻ വാടകയ്‌ക്കെടുത്ത കാർ പാപ്പച്ചൻ ഓടിച്ച സൈക്കിളിലേക്ക് ഇടിച്ചു കയറ്റിയാണ് അപകടം ഉണ്ടാക്കിയത്.

ബിഎസ്എൻഎൽ റിട്ട. ഡിവിഷനൽ എൻജിനീയറായ സി.പാപ്പച്ചൻ മേയ് 26നാണ് മരിച്ചത്. കേസിലെ പ്രതിയും സ്വകാര്യ ബാങ്കിലെ വനിത മാനേജരായ സരിത 40 ലക്ഷം രൂപ തട്ടിയെടുത്തതു പാപ്പച്ചൻ ചോദ്യം ചെയ്തിരുന്നു. 76 ലക്ഷം രൂപയാണ് പാപ്പച്ചന്റെ ബാങ്ക് അക്കൗണ്ടിൽ സ്ഥിരനിക്ഷേപമായി ഉണ്ടായിരുന്നത്. ഇതിൽ 40 ലക്ഷം രൂപ സരിത വകമാറ്റി ചെലവഴിച്ചത് പാപ്പച്ചൻ അറിഞ്ഞതോടെ ഇരുവരും തമ്മിൽ വാക്കുതർക്കമുണ്ടായി. അങ്ങനെ പ്രശ്നപരിഹാരത്തിനെന്ന പേരിൽ പാപ്പച്ചനെ വിളിച്ചുവരുത്തുകയും കാറിടിപ്പിച്ചു കൊല്ലുകയുമായിരുന്നു.

സരിതയും മറ്റൊരു ബാങ്ക് ഉദ്യോഗസ്ഥനായ അനൂപും ചേർന്നാണ് അനിമോൻ എന്നയാൾക്ക് 15 ലക്ഷം രൂപയുടെ ക്വട്ടേഷൻ നൽകിയത്. പാപ്പച്ചന്റെ മരണം റോഡ് അപകടമാണെന്നായിരുന്നു പ്രാഥമിക നിഗമനം. എന്നാൽ അന്വേഷണം അവസാനിപ്പിക്കാൻ ഒരുങ്ങുമ്പോഴാണു ഞെട്ടിക്കുന്ന വസ്തുതകൾ മറനീക്കി പുറത്തുവന്നത്. വിരമിക്കൽ ആനുകൂല്യമായി കിട്ടിയ പണം പാപ്പച്ചൻ സ്വകാര്യ ബാങ്കിൽ‌ സ്ഥിരനിക്ഷേപമായി ഇട്ടിരുന്നു. എന്നാൽ പാപ്പച്ചൻ കുടുംബവുമായി അത്ര നല്ല ബന്ധത്തിലല്ലെന്ന് മാനേജർ അടക്കമുള്ളവർക്ക് അറിയാമായിരുന്നു. അതിനാൽ പാപ്പച്ചൻ മരിച്ചാൽ തുക ചോദിച്ച് ആരും വരില്ലെന്ന് മനസ്സിലാക്കിയാണു സരിത പദ്ധതികൾ ആസൂത്രണം ചെയ്തത്.