ഈ മണ്ഡലകാലത്തും പത്തനംതിട്ട ജില്ലയ്ക്ക് പുറത്തുനിന്നുള്ള ഓട്ടോറിക്ഷകളെ പമ്പ പാതയില് അനുവദിക്കില്ല. ഓട്ടോറിക്ഷകള്ക്ക് സംസ്ഥാന പെര്മിറ്റ് നൽകുന്നത് സംബന്ധിച്ച് തീരുമാനം ഉണ്ടാകാതായതോടെയാണ് ഇക്കാര്യത്തിൽ വ്യക്തത വന്നത്. പമ്പയിലേക്ക് ഇതരജില്ലകളില്നിന്നുള്ള ഓട്ടോറിക്ഷകള്ക്ക് നേരത്തേതന്നെ നിയന്ത്രണം ഏര്പ്പെടുത്തിയിട്ടുണ്ട്
ഹെയര്പിന് വളവുകള് ധാരാളമുള്ള പമ്പ പാതയില് വലിയവാഹനങ്ങള് സഞ്ചരിക്കുന്നതിനിടയില് ഓട്ടോറിക്ഷകള് ശ്രദ്ധയില്പ്പെടാതെ അപകടങ്ങള്ക്ക് സാധ്യതയുണ്ട്. ഒപ്പം കുത്തനെയുള്ള കയറ്റങ്ങളില് ഓട്ടോറിക്ഷയുടെ നിയന്ത്രണംവിട്ടാല് വലിയ അപകടങ്ങളും സംഭവിക്കും. അപകടമുണ്ടായാല് കാറിലെപോലെ സീറ്റ് ബെല്റ്റ്, എയര്ബാഗ് പോലെയുള്ള സുരക്ഷാസംവിധാനങ്ങളും ഓട്ടോറിക്ഷയില് ഇല്ല. ഇത്തരത്തിലുള്ള അപകട സാധ്യത കണക്കിലെടുത്താണ് പമ്പയിലേക്ക് ഇതരജില്ലകളില്നിന്നുള്ള ഓട്ടോറിക്ഷകള്ക്ക് നേരത്തേ തന്നെ നിയന്ത്രണം ഏര്പ്പെടുത്തിയത്. ഇവിടെ പ്രാദേശിക ഓട്ടോകള്ക്ക് മാത്രമേ സര്വീസ് നടത്താന് അനുമതിയുള്ളൂ. ശബരിമല സേഫ് സോണ് പദ്ധതി നടപ്പാക്കിയശേഷം അപകടങ്ങള് ഒട്ടേറെ കുറഞ്ഞിട്ടുണ്ട്.
കഴിഞ്ഞ ഓഗസ്റ്റിലാണ് സംസ്ഥാന ട്രാന്സ്പോര്ട്ട് അതോറിറ്റി യോഗത്തില് ഓട്ടോറിക്ഷകള്ക്ക് സംസ്ഥാന പെര്മിറ്റ് അനുമതി നല്കാന് തീരുമാനമായത്. എന്നാല് ഈ തീരുമാനം ഉത്തരവായി ഇറങ്ങിയില്ല. ഉത്തരവ് ഇറങ്ങിയാലും ഇറങ്ങിയാലും സംസ്ഥാന പെര്മിറ്റിന് പ്രത്യേകം അപേക്ഷ നല്കി ഉത്തരവ് വാങ്ങിയാല് മാത്രമേ ജില്ലയ്ക്ക് പുറത്ത് ഓടാന് സാധിക്കൂ.
