പ്രതിരോധ കുത്തിവയ്പ്പിനിടെ മൃഗഡോക്ടറെ കടിച്ച നായയ്ക്ക് പേവിഷബാധ

തൊടുപുഴ: പ്രതിരോധ കുത്തിവയ്പ്പിനിടെ മൃഗഡോക്ടറെ കടിച്ച നായയ്ക്കു പേവിഷബാധ സ്ഥിരീകരിച്ചു. തൊടുപുഴ ജില്ലാ മൃഗാശുപത്രിയിലെ വെറ്ററിനറി സർജൻ ജെയ്സൺ ജോർജിനാണു കഴിഞ്ഞ വ്യാഴാഴ്ച കടിയേറ്റത്. മണക്കാട് സ്വദേശിയുടെ ലാബ്രഡോർ ഇനത്തിൽപ്പെട്ട നായയാണു പ്രതിരോധ വാക്സീനെടുക്കുന്നതിനിടെ ഡോക്ടറെ കടിച്ചത്.

നായ ഇന്നലെ ചത്തതിനെ തുടർന്ന് തിരുവല്ല പക്ഷിരോഗ നിർണയ ലാബിൽ നടത്തിയ പരിശോധനയിലാണു പേവിഷബാധ സ്ഥിരീകരിച്ചത്. നായയുടെ ഉടമസ്ഥനും ഭാര്യയ്ക്കും കടിയേറ്റിരുന്നു. മൂന്നുപേർക്കും അന്നു തന്നെ പ്രതിരോധ കുത്തിവയ്പ് നൽകി തുടങ്ങി. ആശങ്കപ്പെടേണ്ട സാഹചര്യമില്ലെന്ന് ആരോഗ്യ വകുപ്പ് അറിയിച്ചു.