ഗ്യാൻവ്യാപിയിൽ നടന്ന ആദ്യദിന സർവേയിൽ ലഭിച്ചത് നിർണ്ണായക വിവരങ്ങൾ ; മസ്ജിദിന്റെ ചുവരുകളിൽ ഹൈന്ദവ ബിംബങ്ങളും ത്രിശൂലം, സ്വസ്‌തിക അടയാളങ്ങളും കണ്ടെത്തി

ലക്‌നൗ: ഗ്യാൻവ്യാപിയിൽ ഇന്നലെ നടന്ന സർവേയിൽ ഹൈന്ദവ ക്ഷേത്രം നിന്ന സ്ഥലത്ത് പിന്നീട് മസ്ജിദ് ഉണ്ടെന്നുള്ള തെളിവുകൾ കണ്ടെടുത്തു. ഗ്യാൻവ്യാപി സമുച്ചയത്തിന്റെ ചുവരുകളിലും തൂണുകളിലും കൊത്തിവച്ചിരിക്കുന്ന ഹൈന്ദവ ബിംബങ്ങളായ ത്രിശൂലം, സ്വസ്തിക, മണി, പുഷ്പം എന്നിവയുടെ ചിത്രങ്ങളും ദൃശ്യങ്ങളുമാണ് സർവേയിൽ ഇന്നലെ കണ്ടെടുത്തത്. ഇതോടെ ക്ഷേത്രം തകർത്ത് തൽസ്ഥാനത്ത് മസ്ജിദ് നിർമ്മിച്ചിരിക്കുകയാണ് എന്ന വാദത്തിന് ബലമേറുകയാണ്.1669-ൽ ഔറംഗസേബ് ഗ്യാൻവ്യപിയിൽ ഉണ്ടായിരുന്ന ശിവക്ഷേത്രം തകർത്ത് തൽസ്ഥാനത്ത് ക്ഷേത്രത്തിന്റെ അവശിഷ്ടങ്ങൾ ഉപയോഗിച്ച് മസ്ജിദ് പണിയുകയായിരുന്നു എന്നാണ് കരുതുന്നത്. ഗ്യാൻവ്യാപിയിൽ പുരാവസ്തുവകുപ്പിന്റെ പരിശോധന 2-ാം ദിനവും തുടരുകയണ്.

സർവ്വേ നടത്താനുള്ള അനുമതി നൽകിയ കോടതി വിധിയെ തുടർന്ന് കനത്ത സുരക്ഷയോടെയാണ് എഎസ്‌ഐ സംഘം സർവ്വേ നടത്തുന്നത്. ആദ്യ ദിനം ചുവരുകളിലും താഴികക്കുടങ്ങളിലും തൂണുകളിലുമുള്ള ബിംബങ്ങളാണ് പരിശോധിച്ചത്. ഓരോ ആലേഖനങ്ങളുടെയും നിർമ്മാണ ശൈലി, പൗരാണികത എന്നിവ രേഖപ്പെടുത്തുകയും, താഴികക്കുടങ്ങളിലും തൂണുകളിലും കൊത്തിയ രൂപങ്ങൾ സർവേയിൽ ഉൾപ്പെടുത്തുകയും ചെയ്തിട്ടുണ്ട്. ഏഴ് മണിക്കൂറോളം നീണ്ട ആദ്യ ദിന സർവേയിൽ സമുച്ചയത്തിന്റെ നാല് മൂലകളിലും ഡയൽ ടെസ്റ്റ് സൂചകങ്ങൾ സ്ഥാപിക്കുകയും സമുച്ചയത്തിന്റെ വിവിധ ഭാഗങ്ങളുടെ ആഴവും ഉയരവും അളക്കുകയും ചെയ്തു.