കൂട്ടപ്പിരിച്ചുവിടല്‍ ; പിതാവിന്റെ ജോലി നഷ്ടമായാൽ ഇന്ത്യയിലേക്ക് മടങ്ങേണ്ടിവരുമെന്ന ആശങ്ക, പതിനാലുകാരിയെ കാണാനില്ല

യുഎസിൽ ഇന്ത്യന്‍ വംശജയായ 14 വയസുള്ള പെണ്‍കുട്ടിയെ മൂന്നാഴ്ചയായി കാണ്മാനില്ല. അമേരിക്കന്‍ സംസ്ഥാനമായ അര്‍ക്കന്‍സയില്‍ കോണ്‍വേയില്‍നിന്നുള്ള തന്‍വി മരുപ്പള്ളി എന്ന വിദ്യാർത്ഥിനിയെയാണ് കാണാതായത്. ജനുവരി 17മുതലാണ് ഇന്ത്യന്‍ വംശജയായ പെൺകുട്ടിയെ കാണാതായത്.

ടെക് മേഖലയിലെ കൂട്ടപ്പിരിച്ചുവിടലില്‍ പിതാവിന് ജോലി നഷ്ടമായാല്‍ ഇന്ത്യയിലേക്ക് മടങ്ങേണ്ടിവരുമോ എന്ന ഭയം കാരണം പെണ്‍കുട്ടി വീടു വിട്ടതാകാമെന്ന് പോലീസ് സൂചിപ്പിക്കുന്നു. ജോലി നഷ്ടപ്പെട്ടാല്‍ എന്തുചെയ്യുമെന്ന് തന്‍വി അച്ഛനോട് ചോദിച്ചിരുന്നതായും അങ്ങനെ സംഭവിച്ചാൽ ഇന്ത്യയിലേക്കു മടങ്ങേണ്ടിവരുമെന്ന് കുട്ടിയോടു പറഞ്ഞിരുന്നുവെന്നും പെൺകുട്ടിയുടെ പിതാവ് പവന്‍ പറഞ്ഞിരുന്നു.
ഇത് കേട്ടപ്പോൾ തന്‍വിക്കു വലിയ ഞെട്ടലായിരുന്നെന്നും. ഞാന്‍ ഇവിടെ അല്ലേ ഉള്ളത്. എന്തിനാണ് ഇന്ത്യയിലേക്ക് മടങ്ങുന്നതെന്ന് അവള്‍ ചോദിച്ചിരുന്നതായും പിതാവ് പറഞ്ഞു. ഇത്തരം ആശങ്കകള്‍ കാരണമാവാം തന്‍വി വീടു വിട്ട് പോയതെന്ന് കോണ്‍വേ പോലീസ് പറയുന്നു. തന്‍വിയെക്കുറിച്ച് വിവരം നല്‍കുന്നവര്‍ക്ക് 5000 ഡോളര്‍ പാരിതോഷികം പ്രഖ്യാപിച്ചിട്ടുണ്ട്. വര്‍ഷങ്ങളായി അമേരിക്കയില്‍ താമസമാക്കിയ തന്‍വിയുടെ മാതാപിതാക്കള്‍ക്ക് ഇനിയും ഇവിടെ പൌരത്വം ലഭിച്ചിട്ടില്ല. അടുത്തിടെ ജോലി നഷ്ടമായ തന്‍വിയുടെ അമ്മയ്ക്ക് നാട്ടിലേക്ക് മടങ്ങേണ്ടി വന്നിരുന്നു.