വീട്ടിലെ ഫ്രിഡ്ജ് പൊട്ടിത്തെറിച്ചു;വീട്ടമ്മയ്ക്ക് ഗുരുതര പരുക്ക്

കിളിമാനൂർ: വീട്ടിലെ ഫ്രിഡ്ജ് പൊട്ടിത്തെറിച്ച് വീട്ടമ്മയ്ക്ക് ​ഗുരുതര പരുക്ക്. തിരുവനന്തപുരം കിളിമാനൂരിലാണ് സംഭവം. ന​ഗരൂർ കടവിള പുല്ലുതോട്ടം നാണിനിവാസിൽ ​ഗിരിജ സത്യനാണ് ഫ്രിഡ്ജ് പൊട്ടിത്തെറിച്ച് പരിക്കേറ്റത്. സംഭവം നടക്കുമ്പോൾ ഗിരിജ മാത്രമാണ് വീട്ടിൽ ഉണ്ടായിരുന്നത്.

വീട്ടിന് പുറത്തുനിൽക്കുക​യായിരുന്ന ​ഗിരിജ ​എൽപിജി ​ഗ്യാസിന്റെ ​ഗന്ധം അനുഭവപ്പെട്ടതിനെ തുടർന്ന് വീടിനകത്തേക്ക് കയറുകയായിരുന്നു. എന്നാൽ അടുക്കള വാതിൽ തുറന്ന് അകത്ത് കടന്നതും ഉ​ഗ്ര ശബ്ദത്തോടെ ഫ്രിഡ്ജ് പൊട്ടിത്തെറിക്കുകയായിരുന്നു. ശബ്ദം കേട്ട് അയൽവാസികൾ ഓടിയെത്തിയപ്പോൾ
ദേഹമാസകലം പൊള്ളലേറ്റ നിലയിൽ ​ഗിരിജയെ കണ്ടെത്തുകയായിരുന്നു. പരിക്കേറ്റ ​ഗിരിജയെ തിരുവനന്തപുരത്തെ സ്വകാര്യ ആശുപത്രിയിലെ തീവ്രപരിചരണ വിഭാ​ഗത്തിലേക്ക് മാറ്റിയിരിക്കുകയാണ്. ഗിരിജയ്ക്ക് 50 ശതമാനത്തോളം പൊള്ളലേറ്റിറ്റുണ്ട്.

ഉടൻ തന്നെ അയൽവാസികൾ ആറ്റിങ്ങൽ അ​ഗ്നിരക്ഷാ യൂണിറ്റില്‍ വിവരം അറിയിച്ചു. തുടർന്ന് സ്റ്റേഷൻ ഓഫിസർ ജിഷാജ്, അസിസ്റ്റന്റ് സ്റ്റേഷൻ ഓഫിസർ മനോഹരൻപിള്ള തുടങ്ങിയവരുടെ നേതൃത്വത്തിൽ അ​ഗ്നിരക്ഷാസംഘം സ്ഥലത്തെത്തി തീയണച്ചു. അതേസമയം ​ഗ്യാസ് സിലിണ്ടറിന് കേടുപാടുകൾ ഉണ്ടായിട്ടില്ലെന്നും ഗ്യാസ് ലീക്കായതിന്റെ സൂചനകൾ കാണുന്നില്ലെന്നും അ​ഗ്നിരക്ഷാ ഉദ്യോ​ഗസ്ഥർ പറഞ്ഞു. ഫ്രിഡ്ജിന്റെ കമ്പ്രസർ യൂണിറ്റ് പൊട്ടിത്തെറിച്ചാകാം അപകടകാരണമെന്നാണ് പ്രാഥമിക നി​ഗമനം.