നിയമസഭാ തിരഞ്ഞെടുപ്പ് പടിവാതിൽക്കൽ! രാജസ്ഥാൻ കോൺഗ്രസ്സിൽ ഗെലോട്ട്-സച്ചിന്‍ പോര് മുറുകുന്നു

ജയ്പുര്‍ : നിയമസഭാ തിരഞ്ഞെടുപ്പ് പടിവാതിൽക്കൽ എത്തി നിൽക്കെ രാജസ്ഥാനില്‍ കോണ്‍ഗ്രസില്‍ തമ്മിലടി. മുഖ്യമന്ത്രി അശോക് ഗലോട്ടിനെ പ്രതിരോധത്തിലാക്കിക്കൊണ്ട് മുൻ ഉപമുഖ്യമന്ത്രിയും യുവനേതാവുമായ സച്ചിന്‍ പൈലറ്റ് രംഗത്തെത്തി. അഴിമതിക്കാര്‍ക്കെതിരെ അതിശക്തമായ നടപടി സ്വീകരിക്കാന്‍ മുഖ്യമന്ത്രി തയാറാകണമെന്ന ആവശ്യമുന്നയിച്ച് വരുന്ന ചൊവ്വാഴ്ച നിരാഹാര സമരം നടത്തുമെന്ന് സച്ചിന്‍ പൈലറ്റ് പ്രഖ്യാപിച്ചു.

2018ലെ നിയമസഭാ തിരഞ്ഞെടുപ്പിന്റെ സമയത്ത് കോണ്‍ഗ്രസ് നല്‍കിയ വാഗ്ദാനങ്ങള്‍ പാലിച്ചുവെന്ന് ജനങ്ങളെ ബോധ്യപ്പെടുത്തേണ്ടത് അത്യാവശ്യമാണെന്നാണ് സച്ചിന്റെ വാദം. എക്‌സൈസ് മാഫിയ, അനധികൃത ഖനനം, ഭൂമി കൈയ്യേറ്റം, ലളിത് മോദി സത്യവാങ്മൂലക്കേസ് എന്നിവയില്‍ ഗെലോട്ട് സര്‍ക്കാര്‍ വൻ പരാജയമെന്നാണ് സച്ചിന്‍ ആരോപിക്കുന്നത്.

കഴിഞ്ഞ തെരഞ്ഞെടുപ്പ് അവസാനിച്ചത് മുതല്‍ ഗെലോട്ടും സച്ചിനും ഇടഞ്ഞു നിൽക്കുകയാണ്. ഇതിൽ ഒടുവിലത്തേതാണ് സച്ചിന്റെ നിരാഹാര സമരപ്രഖ്യാപനം. 2018ല്‍ സംസ്ഥാനത്ത് കോണ്‍ഗ്രസ് അധികാരത്തില്‍ എത്തിയപ്പോള്‍ മുഖ്യമന്ത്രി സ്ഥാനം വീതിച്ചു നല്‍കാമെന്ന് ഹൈക്കമാന്‍ഡ് സച്ചിന് ഉറപ്പു നല്‍കിയിരുന്നുവെന്നാണ് ലഭിക്കുന്ന വിവരം. എന്നാൽ ആ ഉറപ്പ് വാക്കിൽ മാത്രമായി ഒതുക്കി, പരാതി ഒഴിവാക്കാനായി സച്ചിന് ഉപമുഖ്യമന്ത്രി സ്ഥാനം വച്ച് നീട്ടുകയുമാണ് ഹൈക്കമാൻഡ് ചെയ്തത്. എന്നാൽ ഉപമുഖ്യമന്ത്രി സ്ഥാനത്തിൽ തൃപ്തനാകാതിരുന്ന സച്ചില്‍ 2020ല്‍ 20 എംഎല്‍എമാരെ ദില്ലിക്ക് സമീപത്തുള്ള റിസോര്‍ട്ടിലേക്കു മാറ്റി മുഖ്യമന്ത്രിസ്ഥാനത്തിനായി നീക്കം നടത്തിയിരുന്നു.

പാര്‍ട്ടി പിളര്‍ത്തുമെന്ന് ഭീഷണിപ്പെടുത്തിയിട്ട്പോലും സച്ചിന്റെ നീക്കം വിജയിച്ചില്ല. ഇതോടെ ഉപമുഖ്യമന്ത്രി സ്ഥാനവും കോണ്‍ഗ്രസ് സംസ്ഥാന അദ്ധ്യക്ഷസ്ഥാനവും സച്ചിന് നഷ്ടമായി. കോണ്‍ഗ്രസ് ദേശീയ അദ്ധ്യക്ഷ സ്ഥാനത്തേക്ക് ഗെലോട്ടിനെ പരിഗണിച്ചെങ്കിലും മുഖ്യമന്ത്രി സ്ഥാനം ഒഴിയാന്‍ അയാൾ ഒരുക്കമായിരുന്നില്ല. ഇതോടെ സച്ചിന് രാജസ്ഥാന്‍ മുഖ്യമന്ത്രി സ്ഥാനം എന്ന മോഹം സ്വപ്‌നമായി തന്നെ അവശേഷിക്കുന്ന സ്ഥിതിയായി മാറി. ഈ ഘട്ടത്തിലാണ് സംസ്ഥാനം വീണ്ടും തെരഞ്ഞെടുപ്പിലേക്ക് പോകുന്നതും കോണ്‍ഗ്രസില്‍ ഗെലോട്ട്-സച്ചിന്‍ പോര് വീണ്ടും മുറുകുന്നത്.