നിങ്ങൾക്ക് ആരോഗ്യ പ്രശ്‍നങ്ങൾ ഉണ്ടോ?എങ്കിൽ സ്ത്രീകൾ തീർച്ചയായും ഈ പരിശോധനകൾ നടത്തേണ്ടതുണ്ട്

ഒരു സ്ത്രീയുടെ ഏറ്റവും മനോഹരമായ കാലമാണ് അവളുടെ ഇരുപതുകളും മുപ്പതുകളുമൊക്കെ. ജോലി, വിവാഹം, അമ്മയാകുക തുടങ്ങിയ കാര്യങ്ങളൊക്കെ മിക്ക സ്ത്രീകളും കണക്കിലെടുക്കുന്നതും പ്രാവർത്തികമാക്കുന്നതും ഈ പ്രായങ്ങളിലാണ്. കുടുംബം, ജോലി, മറ്റ് ഉത്തരവാദിത്തങ്ങൾ തുടങ്ങിയവയെല്ലാം കൂടിയാകുമ്പോൾ ചില സ്ത്രീകളെങ്കിലും അവരുടെ പല ആരോഗ്യ പ്രശ്‌നങ്ങളൂം അവഗണിക്കാരാണ് പതിവ്. ഫലമോ, ഇത് പിന്നീട് പല ഗുരുതര രോഗങ്ങളിലേയ്ക്ക് നയിക്കുകയും ചെയ്യും. വർഷത്തിലൊരിക്കലെങ്കിലും തങ്ങളുടെ ആരോഗ്യം മികച്ചതാണോ എന്ന് പരിശോധിക്കാനും ആരും മെനക്കെടാറില്ല.പ്രായം മുപ്പത് പിന്നിട്ടെങ്കിൽ തങ്ങളുടെ ആരോഗ്യ സ്ഥിതി ഉറപ്പാക്കാൻ ഓരോ സ്ത്രീയും നടത്തേണ്ട ചില ആരോഗ്യ പരിശോധനകളുണ്ട്.

സ്തനാർബുദം തിരിച്ചറിയാൻ
​
സ്തനാർബുദത്തിന്റെ രോഗനിർണയത്തിനാണ് മാമോഗ്രാഫി (Mammography) ചെയ്യുന്നത്. ശക്തികുറഞ്ഞ തരംഗങ്ങൾ സ്തനങ്ങളിലേക്ക് കടത്തിവിട്ടാണ് ഇത് കണ്ടെത്തുന്നത്. ലക്ഷണങ്ങൾ കണ്ടെത്തിയാൽ ഉടൻ തന്നെ സ്തനാർബുദം തിരിച്ചറിയാൻ ഈ സ്ക്രീനിംഗ് ടെസ്റ്റിലൂടെ സാധിക്കുന്നു. ലോകമെമ്പാടുമുള്ള ക്യാൻസർ കണക്കുകൾ പരിശോധിച്ചാൽ സ്തനാർബുദം രണ്ടാമത് നിൽക്കുന്നു എന്ന് നാഷണൽ ക്യാൻസർ ഇൻസ്റ്റിറ്റ്യൂട്ട് പറയുന്നു. സ്കിൻ ക്യാൻസർ ആണ് ആദ്യം. മുപ്പതുകളിലുള്ള സ്ത്രീകൾ രണ്ട് വർഷത്തിൽ ഒരിക്കലെങ്കിലും മാമ്മോഗ്രാം പരിശോധനകൾ നടത്തേണ്ടതുണ്ട്. ചിലപ്പോൾ ലക്ഷണങ്ങൾ ഒന്നും പ്രകടമായില്ലെങ്കിൽ പോലും ഈ പരിശോധന നടത്തുന്നത് രോഗനിർണ്ണയം വേഗത്തിലാക്കാൻ സഹായിക്കും.

സെർവിക്കൽ ക്യാൻസർ കണ്ടെത്താൻ

പാപ്പ് സ്മിയർ ടെസ്റ്റ് അഥവാ പാപ്പ് ടെസ്റ്റ് (Pap Smear) എന്ന പരിശോധന പ്രധാനമായും സെർവിക്കൽ ക്യാൻസർ കണ്ടെത്താനാണ് ചെയ്യുന്നത്. ഗർഭാശയത്തിൽ ആരംഭ ഭാഗത്ത് ക്യാൻസർ കോശങ്ങൾ വളരുന്നുണ്ടോ എന്ന് കണ്ടെത്താനാണ് ഈ പരിശോധന. നമ്മുടെ നാട്ടിലും സ്ത്രീകളിൽ സെർവിക്കൽ ക്യാൻസർ കൂടി വരുന്ന സാഹചര്യത്തിൽ സ്ത്രീകൾ വർഷത്തിലൊരിക്കലെങ്കിലും ഈ ടെസ്റ്റ് നടത്തുന്നത് നന്നായിരിക്കും.

ഹൃദ്രോഗ സാധ്യത കണ്ടെത്താൻ

ഹൃദയത്തിന്റെ ആരോഗ്യം നിർണ്ണയിക്കാൻ ​ലിപിഡ് പ്രൊഫൈൽ പരിശോധന നടത്തുന്നു. ഹൃദ്രോഗ സാധ്യത കണ്ടെത്തുന്നതിനും ഭക്ഷണശീലമുൾപ്പടെ മറ്റ് ജീവിതശൈലി ഘടകങ്ങൾ വിലയിരുത്തി അപകട സാദ്ധ്യതകൾ തിരിച്ചറിയുന്നതിനുമാണ് ഈ പരിശോധനകൾ നടത്തുന്നത്. രക്തത്തിലും ടിഷ്യുകളിലും സംഭരിക്കപ്പെടുന്ന കൊഴുപ്പ് കൂടിയ പദാർത്ഥങ്ങളായ ലിപിഡുകൾ ശാരീരിക പ്രവർത്തനങ്ങൾ സാധാരണ നിലയിൽ നിലനിർത്താൻ നമ്മെ സഹായിക്കുന്നു. എന്നാൽ ഈ കൊളസ്‌ട്രോൾ കൂടുമ്പോൾ അത് ഹൃദയത്തിന്റെ ആരോഗ്യത്തെയും മോശമായി ബാധിക്കും. നിങ്ങളുടെ ഭക്ഷണശീലം അനാരോഗ്യകരമെങ്കിൽ, വ്യായാമം ഒഴിവാക്കുന്നെങ്കിൽ നിർബന്ധമായും ലിപിഡ് പ്രൊഫൈൽ പരിശോധനകൾ നടത്തേണ്ടതുണ്ട്.

സ്കിൻ ക്യാൻസർ കണ്ടുപിടിക്കാൻ

ചർമ്മ ക്യാൻസർ ഇന്ന് സ്ത്രീകളിൽ വർധിച്ച് വരികയാണ്. ഇത് പിടിപെടാനുള്ള സാധ്യത തിരിച്ചറിയാനും രോഗ നിർണ്ണയം നടത്താനും സ്ക്രീനിങ് ടെസ്റ്റുകൾ ഇടയ്ക്ക് നടത്തുക. ഇതിനായി വർഷത്തിലൊരിക്കലെങ്കിലും ഒരു ത്വക്ക് രോഗ വിദഗ്ധനെ സമീപിക്കാവുന്നതാണ്. രോഗം പിടിപെട്ട് മൂർച്ഛിച്ച ശേഷം ചികിത്സ തേടുന്നതിനേക്കാൾ നല്ലതല്ലേ നേരത്തെ രോഗ നിർണ്ണയം നടത്തുന്നത്! അതിനാൽ ആരോഗ്യ പരിശോധനയുടെ ഭാഗമായി സ്കിൻ ക്യാൻസർ കണ്ടെത്താനുള്ള സ്ക്രീനിംഗ് ടെസ്റ്റും ഉൾപ്പെടുത്താം.

​പ്രമേഹ പരിശോധന
​
രക്തത്തിലെ പഞ്ചസാരയുടെ അളവ് പരിശോധിക്കുന്നതിന് വേണ്ട പരിശോധനകൾ കൃത്യമായ ഇടവേളകളിൽ ചെയ്യുക. ശരിയായ സമയത്ത് പരിശോധന നടത്തി രക്തത്തിലെ പഞ്ചസാരയുടെ അളവ് നിയന്ത്രിക്കാൻ ശ്രദ്ധിക്കുക. അതല്ലെകിൽ പ്രമേഹം കൂടിയാൽ അത് മറ്റ് അവയവങ്ങളുടെ പ്രവർത്തനത്തെ ബാധിക്കുകയും പ്രശ്നം ഗുരുതരമാകുകയും ചെയ്യും.