ഗാന്ധിനഗർ : അന്തരിച്ച മലയാളത്തിന്റെ പ്രിയ എഴുത്തുകാരൻ എം ടി വാസുദേവൻ നായർക്ക് ശ്രദ്ധാഞ്ജലിയുമായി രാജ്യത്തെ പ്രമുഖ ക്ഷീരോൽപാദക സഹകരണസംഘ പ്രസ്ഥാനമായ അമുൽ. സമൂഹ മാദ്ധ്യമങ്ങളിൽ പങ്കുവച്ച ഒരു കാർട്ടൂൺ പോട്രേറ്റിലൂടെയാണ് അമ്മ മലയാളത്തിന്റെ ഇതിഹാസത്തിന് അമുൽ ശ്രദ്ധാഞ്ജലി അർപ്പിച്ചത്. രാജ്യത്തെ പ്രധാന സംഭവ വികാസങ്ങളെ കാർട്ടൂൺ വരകളിലൂടെ അമുൽ പങ്കുവയ്ക്കാറുണ്ട്.
കോഴിക്കോട്ടെ ആശുപത്രിയിൽ ഹൃദയസംബന്ധമായ അസുഖത്തെ തുടർന്ന് ചികിത്സയിലിരിക്കെ ഇക്കഴിഞ്ഞ ബുധനാഴ്ച രാത്രി പത്ത് മണിയോടെയാണ് എം ടി വാസുദേവൻ നായർ വിടവാങ്ങിയത്. ഹൃദ്രോഗവും ശ്വാസതടസവും അനുഭവപ്പെട്ടതിനെ തുടർന്ന് 11 ദിവസമായി എം ടി വാസുദേവൻ നായർ ആശുപത്രിയിൽ കഴിയുകയായിരുന്നു. ചികിത്സയിലിരിക്കെ കഴിഞ്ഞ ദിവസം ഹൃദയാഘാതം ഉണ്ടായതാണ് ആരോഗ്യനില വഷളാക്കിയത്. ഇന്നലെ വൈകുന്നേരത്തോടെ വൃക്കയുടെയും ഹൃദയത്തിന്റെയും പ്രവർത്തനം മന്ദഗതിയിലായതിന് പിന്നാലെയാണ് മരണം സംഭവിച്ചത്.
ഒരു മാസത്തിനിടെ പല തവണ എം.ടിയെ ആശുപത്രിയിൽ പ്രവേശിപ്പിച്ചിരുന്നു. ഏറ്റവുമൊടുവിൽ ശ്വാസ തടസത്തെ തുടര്ന്നാണ് ഇക്കഴിഞ്ഞ 15ന് അദ്ദേഹത്തെ ആശുപത്രിയിൽ പ്രവേശിപ്പിച്ചത്. ഹൃദയ സംബന്ധമായ പ്രശ്നങ്ങളും കുറച്ചു നാളുകളായി അലട്ടിയിരുന്നു. മരണസമയത്ത് മകള് അശ്വതിയും ഭര്ത്താവ് ശ്രീകാന്തും കൊച്ചുമകന് മാധവും സമീപത്തുണ്ടായിരുന്നു
1933 ജൂലായ് 15-ന് പൊന്നാനി താലൂക്കിലെ കൂടല്ലൂരിലായിരുന്നു എം.ടിയുടെ ജനനം. പുന്നയൂര്ക്കുളം ടി. നാരായണന് നായരും അമ്മാളുഅമ്മയുമാണ് മാതാപിതാക്കള്. നാല് ആണ്മക്കളില് ഇളയ മകന്. മലമക്കാവ് എലിമെന്ററി സ്കൂള്, കുമരനെല്ലൂര് ഹൈസ്കൂള് എന്നിവിടങ്ങളിലെ പ്രാഥമിക വിദ്യാഭ്യാസത്തിനുശേഷം പാലക്കാട് വിക്ടോറിയ കോളേജില്നിന്ന് 1953-ല് രസതന്ത്രത്തില് ബിരുദം നേടി. കുറച്ചുകാലം അധ്യാപകന്. തുടര്ന്ന് 1956-ല് മാതൃഭൂമിയില് സബ് എഡിറ്ററായി ഔദ്യോഗിക ജീവിതത്തിന് തുടക്കമിട്ടു.
വിക്ടോറിയ പഠനകാലത്ത് പ്രസിദ്ധീകരിച്ച ‘രക്തം പുരണ്ട മണ്തരികള്’ ആണ് അദ്ദേഹത്തിന്റെ ആദ്യ പുസ്തകം. 1958-ല് പ്രസിദ്ധീകരിച്ച ‘നാലുകെട്ട്’ ആണ് ആദ്യം പുസ്തകരൂപത്തില് പ്രസിദ്ധീകരിച്ചത്.ഈ കൃതി 1959-ലെ കേരള സാഹിത്യ അക്കാദമി പുരസ്കാരം നേടി.
1968-ല് മാതൃഭൂമി ആഴ്ചപ്പതിപ്പിന്റെ പത്രാധിപരായി. 1981-ല് ആ സ്ഥാനം രാജിവെച്ചു. 1989-ല് പീരിയോഡിക്കല്സ് എഡിറ്റര് എന്ന പദവിയില് തിരികെ മാതൃഭൂമിയിലെത്തി. 1999-ല് മാതൃഭൂമിയില്നിന്ന് വിരമിച്ചശേഷം കേരള സാഹിത്യ അക്കാദമിയുടെ അധ്യക്ഷനായി സേവനമനുഷ്ഠിച്ചു. നിലവില് തുഞ്ചന് സ്മാരക സമിതിയുടെ അധ്യക്ഷനാണ്.
‘കാലം’, ‘അസുരവിത്ത്, ‘വിലാപയാത്ര’, ‘മഞ്ഞ്, എന്.പി. മുഹമ്മദുമായി ചേര്ന്നെഴുതിയ ‘അറബിപ്പൊന്ന്, ‘രണ്ടാമൂഴം’, ‘വാരാണസി’ തുടങ്ങിയ നോവലുകള്. കൂടാതെ ഒട്ടനവധി ചെറുകഥകളും നോവലെറ്റുകളും. എം.ടിയുടെ കരസ്പര്ശമേറ്റതെല്ലാം മലയാളികള് ഹൃദയത്തില് ഏറ്റുവാങ്ങി. 1984-ലാണ് ‘രണ്ടാമൂഴം’ പുറത്തുവരുന്നത്. ഭീമനെ കേന്ദ്രകഥാപാത്രമാക്കി, മഹാഭാരതത്തെ ഭീമന്റെ വീക്ഷണത്തില് കാണുന്ന ‘രണ്ടാമൂഴം’ എം.ടിയുടെ മാസ്റ്റര്പീസായി വിലയിരുത്തപ്പെടുന്നു.
സ്വന്തം കൃതിയായ ‘മുറപ്പെണ്ണി’ന് തിരക്കഥയെഴുതിയാണ് ചലച്ചിത്രലോകത്ത് പ്രവേശിക്കുന്നത്. തുടര്ന്ന് തിരക്കഥാകൃത്ത്, സംവിധായകന് എന്നിങ്ങനെ മലയാള ചലച്ചിത്ര ചരിത്രത്തിലെ നാഴികക്കല്ലുകളായി മാറിയ അന്പതിലേറെ ചലച്ചിത്രങ്ങളുടെ പിന്നണിയില് അദ്ദേഹമുണ്ടായിരുന്നു. നിര്മ്മാല്യം(1973), ബന്ധനം(1978), മഞ്ഞ്(1982), വാരിക്കുഴി(1982), കടവ് (1991), ഒരു ചെറുപുഞ്ചിരി(2000) എന്നീ ചിത്രങ്ങള് സംവിധാനം ചെയ്തു.
2005-ല് രാജ്യം എം.ടിയെ പത്മഭൂഷണ് നല്കി ആദരിച്ചു. ജ്ഞാനപീഠം 1995-ല് ലഭിച്ചു. കേന്ദ്ര സാഹിത്യ അക്കാദമി അവാര്ഡ് (കാലം), കേരള സാഹിത്യ അക്കാദമി അവാര്ഡ് (നാലുകെട്ട്), വയലാര് അവാര്ഡ് (രണ്ടാമൂഴം), മാതൃഭൂമി പുരസ്കാരം, ഓടക്കുഴല് അവാര്ഡ്, മുട്ടത്തുവര്ക്കി അവാര്ഡ്, പത്മരാജന് പുരസ്കാരം എന്നിങ്ങനെ എണ്ണപ്പെട്ട ബഹുമതികള് അദ്ദേഹത്തിന് ലഭിച്ചു. മലയാളസാഹിത്യത്തിന് നല്കിയ അമൂല്യസംഭാവനകള് കണക്കിലെടുത്ത് കോഴിക്കോട് സര്വകലാശാലയും മഹാത്മ ഗാന്ധി സര്വകലാശാലയും ഡി.ലിറ്റ്. നല്കി ആദരിച്ചു. എം.ടി. ആദ്യമായി സംവിധാനം ചെയ്ത ചിത്രമായ ‘നിര്മ്മാല്യം’ 1973-ലെ ഏറ്റവും നല്ല ചലച്ചിത്രത്തിനുള്ള ദേശീയ പുരസ്കാരം നേടി. ഇതിനുപുറമേ മുപ്പതിലേറെ ദേശീയ, സംസ്ഥാന അവാര്ഡുകള് അദ്ദേഹത്തിന് ലഭിച്ചിട്ടുണ്ട്
