പട്ടാമ്പിയിൽ ജപ്തി നടപടി നേരിട്ടതിനെത്തുടർന്ന് ആത്മഹത്യക്ക് ശ്രമിച്ച വീട്ടമ്മ മരിച്ച സംഭവത്തിൽ അസ്വാഭാവിക മരണത്തിന് പോലീസ് കേസ്സെടുത്തു. പട്ടാമ്പി കിഴായൂര് കിഴക്കേ പുരക്കല് ജയ (48)യാണ് തൃശ്ശൂര് മെഡിക്കല് കോളേജില് ചികിത്സയിലിരിക്കെ ഇന്നലെ മരിച്ചത്. ഇന്ന് ജയയുടെ ഭര്ത്താവ് ഉദയന് സ്റ്റേഷനിലെത്തി മൊഴി നല്കിയതിന് പിന്നാലെയാണ് പട്ടാമ്പി പോലീസ് അസ്വാഭാവിക മരണത്തിന് കേസ്സെടുത്തിട്ടുള്ളത്.
കോടതി നടപടി പ്രകാരം ജപ്തി നടപടികള്ക്കായാണ് ഷൊര്ണൂര് കോ-ഓപ്പറേറ്റിവ് അര്ബന് ബാങ്ക് ഉദ്യോഗസ്ഥരും , പോലീസും, റവന്യൂ വകുപ്പ് ഉദ്യോസ്ഥരും ജയയുടെ വീട്ടില് എത്തിയത്. ഉദ്യോഗസ്ഥരെത്തി ഇക്കാര്യം അറിയിച്ചപ്പോള് ജയ മണ്ണെണ്ണയൊഴിച്ച് തീകൊളുത്തുകയായിരുന്നു. തുടര്ന്ന് നാട്ടുകാരും പോലീസും ചേര്ന്ന് ഇവരെ സമീപത്തെ സ്വകാര്യ ആശുപത്രിയിലും തുടര്ന്ന് തൃശ്ശൂര് മെഡിക്കല് കോളേജിലേക്കും മാറ്റി. 80 ശതമാനത്തോളം പൊള്ളലേറ്റ് ഗുരുതരാവസ്ഥയിൽ ഇവിടെ ചികിത്സയിലിരിക്കെയാണ് രാത്രി ഏഴ് മണിയോടെ ജയ മരിക്കുന്നത്.
ഷൊര്ണൂര് കോഓപ്പറേറ്റീവ് അര്ബന് ബാങ്കില് നിന്നും 2015-ല് രണ്ട് ലക്ഷം രൂപ ജയയും, ഭര്ത്താവും ചേര്ന്ന് ലോണെടുത്തത്. തിരിച്ചടവുകള് തെറ്റിയതോടെ ഇപ്പോള് അഞ്ച് ലക്ഷം രൂപയുടെ കടബാധ്യതയായി മാറുകയായിരുന്നു
