ഓപ്പറേഷൻ സിന്ദൂറിൽ ഭാരതം തകർത്ത ബഹാവൽപൂരിലെ ജയ്ഷെ മുഹമ്മദ് ആസ്ഥാനം പുനർനിർമ്മിച്ചു! കനത്ത സാമ്പത്തിക പ്രതിസന്ധിക്കിടയിലും ഭീകരവാദത്തിന് കുടപിടിക്കാൻ പാക് സർക്കാർ ഗഡുക്കളായി നൽകിയത് 25 കോടി പാകിസ്ഥാനി രൂപ

ഇസ്ലാമബാദ് : ഓപ്പറേഷൻ സിന്ദൂറിലൂടെ ഭാരതം തകർത്ത ഭീകരവാദ സംഘടനയായ ജെയ്ഷെ മുഹമ്മദിന്റെ പാകിസ്ഥാനിലെ ബഹവൽപൂർ ആസ്ഥാനം പുനർനിർമ്മിച്ചതായി റിപ്പോർട്ട്. ഏകദേശം പതിനഞ്ച് മാസം മുമ്പ് തകർക്കപ്പെട്ട മാർകസ് സുഭാനല്ലാഹ് സമുച്ചയമാണ് ഇപ്പോൾ വീണ്ടും പ്രവർത്തനസജ്ജമായിരിക്കുന്നത്. പാകിസ്ഥാൻ സർക്കാരിന്റെയും രഹസ്യാന്വേഷണ ഏജൻസിയായ ഐ.എസ്.ഐയുടെയും അറിവോടെയും ഒത്താശയോടെയുമാണ് ഈ പുനർനിർമ്മാണം നടന്നിരിക്കുന്നതെന്നാണ് പുറത്തുവരുന്ന പ്രധാന വിവരങ്ങൾ. പുനർനിർമ്മാണ പ്രവർത്തനങ്ങൾക്കായി പാകിസ്ഥാൻ ഗവൺമെന്റ് ഗഡുക്കളായി ഏകദേശം 25 കോടി രൂപ (പാകിസ്ഥാൻ രൂപ) അനുവദിച്ചതായാണ് രഹസ്യാന്വേഷണ ഏജൻസികൾ വ്യക്തമാക്കുന്നത്.

ഇതിൽ ഏകദേശം 11 കോടി രൂപയോളം ചെലവഴിച്ചാണ് സമുച്ചയത്തിലെ പ്രധാന ഹാൾ പൂർണ്ണമായും നടിപ്പണി നടത്തിയിരിക്കുന്നത്. കേടുപാടുകൾ തീർത്ത് പുതിയ മാർബിൾ പാകിയും മനോഹരമായ പെയിന്റിംഗുകളോടെയും ഹാൾ വീണ്ടും സജ്ജീകരിച്ചിട്ടുണ്ട്. 2026-ന്റെ തുടക്കത്തിൽത്തന്നെ ഇവിടെ കനത്ത നിർമ്മാണ പ്രവർത്തനങ്ങളും യന്ത്രങ്ങളുടെ സാന്നിധ്യവും ദൃശ്യമായിരുന്നു. നാഷണൽ ഹൈവേ എൻ-5 നോട് ചേർന്നു സ്ഥിതി ചെയ്യുന്ന ഈ കേന്ദ്രം ജെയ്ഷെ മുഹമ്മദിന്റെ റിക്രൂട്ട്മെന്റ് സെന്ററായും മദ്രസയായും ആസൂത്രണ കേന്ദ്രമായുമാണ് പ്രവർത്തിച്ചിരുന്നത്. പാകിസ്ഥാൻ സൈന്യത്തിന്റെ 31 കോർപ്സ് മിലിട്ടറി കന്റോൺമെന്റിന് സമീപത്തായി സ്ഥിതി ചെയ്യുന്ന ഈ കേന്ദ്രത്തിന് ഔദ്യോഗിക സംരക്ഷണം ലഭിക്കുന്നുണ്ടെന്നതിന്റെ തെളിവാണ് ഈ അതിവേഗ പുനർനിർമ്മാണമെന്ന് സുരക്ഷാ നിരീക്ഷകർ വിലയിരുത്തുന്നു. ഭീകരവാദ ഇൻഫ്രാസ്ട്രക്ചറുകൾ പൂർണ്ണമായി തകർക്കപ്പെട്ടില്ലെന്നും ഭരണകൂട പിന്തുണയോടെ അവ വീണ്ടും തലപൊക്കുന്നുവെന്നുമുള്ള യാഥാർത്ഥ്യമാണ് ഈ സംഭവത്തിലൂടെ ഒരിക്കൽക്കൂടി വ്യക്തമാകുന്നത്.