തീയണയാതെ പശ്ചിമേഷ്യൻ യുദ്ധം;രാജ്യത്ത് വീണ്ടും ഇന്ധന വില വർധിച്ചു ! കൂടിയത് പെട്രോൾ ലിറ്ററിന് 2.61 രൂപയും ഡീസലിന് 2.71 രൂപയും

ദില്ലി : പശ്ചിഷ്യൻ യുദ്ധത്തിന്റെ ഫലമായുണ്ടായ ആഗോള എണ്ണപ്രതിസന്ധി മൂലം രാജ്യത്ത് വീണ്ടും ഇന്ധനവില വർധനവ്. കഴിഞ്ഞ പതിനൊന്ന് ദിവസത്തിനിടെ നാലാം തവണയാണ് രാജ്യത്ത് ഇന്ധനവില വർധിച്ചത്. പുതിയ വിലവർധനവോടെ രാജ്യതലസ്ഥാനമായ ദില്ലിയിൽ പെട്രോൾ വില ലിറ്ററിന് 100 രൂപയെന്ന പരിധി ഭേദിച്ചു മുന്നേറുകയാണ്. ദില്ലിയിൽ പെട്രോളിന് 2 രൂപ 61 പൈസയും ഡീസലിന് 2 രൂപ 71 പൈസയുമാണ് ഒടുവിലായി വർധിപ്പിച്ചത്. ഇതോടെ ഒരു ലിറ്റർ പെട്രോളിന്റെ വില 102 രൂപ 12 പൈസയായും ഡീസൽ വില 95 രൂപ 20 പൈസയായും ഉയർന്നു.

കൊൽക്കത്തയിൽ പെട്രോൾ വില 113 രൂപ 51 പൈസയായും മുംബൈയിൽ 111 രൂപ 21 പൈസയായും ചെന്നൈയിൽ 107 രൂപ 77 പൈസയായും കുതിച്ചുയർന്നു. ഡീസൽ നിരക്കിലും സമാനമായ വർധനവാണ് രേഖപ്പെടുത്തിയിരിക്കുന്നത്. കൊൽക്കത്തയിൽ 99.82 രൂപയും, ചെന്നൈയിൽ 99.55 രൂപയും, മുംബൈയിൽ 97.83 രൂപയുമാണ് പുതിയ ഡീസൽ നിരക്കുകൾ. കഴിഞ്ഞ ശനിയാഴ്ചയും രാജ്യത്ത് പെട്രോൾ, ഡീസൽ വിലകൾ വർധിപ്പിച്ചിരുന്നു. ഇതിനൊപ്പം ദില്ലിയിൽ സിഎൻജി വിലയും കിലോഗ്രാമിന് ഒരു രൂപ വർധിച്ച് 81.09 രൂപയിലെത്തിയിരുന്നു. നിലവിലെ ആഗോള വിപണിയിൽ ബ്രെന്റ് ക്രൂഡ് ഓയിൽ വില ഈ മാസത്തിൽ ആദ്യമായി ബാരലിന് 100 ഡോളറിന് താഴേക്ക് പതിച്ച ദിവസമാണ് ഇന്ത്യയിൽ ഇത്തരമൊരു വിലവർധനവ് നടപ്പിലാക്കിയത് എന്നത് വിരോധാഭാസമായി തുടരുന്നു.

ലോകത്തെ പ്രമുഖ എണ്ണക്കപ്പൽ പാതയായ ഹോർമുസ് കടലിടുക്കിൽ യുദ്ധം സൃഷ്ടിച്ച സുരക്ഷാഭീഷണിയാണ് ഇപ്പോഴത്തെ പ്രതിസന്ധിക്ക് പ്രധാന കാരണം. യുദ്ധം തുടങ്ങി രണ്ടുമാസം പിന്നിടുമ്പോഴും എണ്ണക്കമ്പനികൾ നേരിട്ട പ്രതിദിന നഷ്ടം ആയിരം കോടി രൂപ കടന്ന സാഹചര്യത്തിലാണ് വില വർധിപ്പിക്കാൻ സർക്കാർ നിർബന്ധിതരായത്. എന്നാൽ യുദ്ധം പരിഹരിക്കപ്പെടാതെ എണ്ണ വിപണിയിലെ അനിശ്ചിതത്വം നീങ്ങില്ലെന്നാണ് സാമ്പത്തിക വിദഗ്ധർ ചൂണ്ടിക്കാണിക്കുന്നത്. നിലവിലുള്ള കടുത്ത പണപ്പെരുപ്പത്തിന് പുറമെ, ഡീസൽ വിലയിലുണ്ടായ ഈ കുതിച്ചുചാട്ടം ചരക്കുനീക്ക കൂലി വർധിപ്പിക്കുകയും പാൽ, ബ്രെഡ് തുടങ്ങിയ നിത്യോപയോഗ സാധനങ്ങളുടെ വില ഇനിയും ഉയർത്താൻ കാരണമാകുകയും ചെയ്യും. നാല് വർഷത്തെ ഇടവേളയ്ക്ക് ശേഷമുള്ള ഈ തുടർച്ചയായ വിലക്കയറ്റം സാധാരണക്കാരുടെ കുടുംബ ബജറ്റുകളെ പൂർണ്ണമായും തകർക്കുന്നതാണ്.