കഴക്കൂട്ടത്ത് നിന്ന് കാണാതായ അസം സ്വദേശിനിയായ പതിമൂന്നുകാരിയുമായി പോലീസ് സംഘം നാളെ യാത്ര തിരിക്കും ; രണ്ടു വനിതാ പോലീസുകാര്‍ ഉള്‍പ്പെടെയുളള പോലീസ് സംഘം വിശാഖപട്ടണത്ത്

തിരുവനന്തപുരം : കഴക്കൂട്ടത്തുനിന്നു കാണാതായ അസം സ്വദേശിനിയായ പതിമൂന്നുകാരിയുമായി പോലീസ് സംഘം നാളെ തിരുവനന്തപുരത്തേക്ക് യാത്ര തിരിക്കും. വിശാഖപട്ടണത്ത് എത്തിയ കഴക്കൂട്ടം പൊലീസ് നാളെ ഉച്ചയ്ക്കു മുൻപ് കുട്ടിയെ ഏറ്റുവാങ്ങി വിജയവാഡയിലെത്തും. നാളെ രാത്രി 10.25 നു വിജയവാഡയിൽ നിന്നും കേരള എക്സ്പ്രസിലാണ് കേരളത്തിലേക്കു തിരിക്കുക. മറ്റന്നാൾ രാത്രി 9.50ന് തിരുവനന്തപുരത്ത് എത്തും.

30 മണിക്കൂറോളം യാത്ര ചെയ്തു വിശാഖപട്ടണത്ത് എത്തിയ രണ്ടു വനിതാ പോലീസുകാര്‍ ഉള്‍പ്പെടെയുളള പോലീസ് സംഘമാണ് ഇന്ന് വിശാഖപട്ടണത്ത് എത്തിയത്. കുട്ടിയുമായി രണ്ടു പേര്‍ വിമാനത്തില്‍ പോകുന്നതിനെക്കുറിച്ച് ആലോചിച്ചെങ്കിലും ഉയർന്ന യാത്രാച്ചെലവു പ്രശ്‌നമായി. വിശാഖപട്ടണത്ത് എത്തിയ പോലീസ് സംഘത്തെ ട്രെയിന്‍ ടിക്കറ്റ് സംഘടിപ്പിക്കാനുള്ള നെട്ടോട്ടത്തില്‍ മലയാളി സംഘടനാ പ്രവര്‍ത്തകരും സഹായിച്ചു.