പ്രതിപക്ഷ ഉപനേതാവ് പദവി! ഇല്ലാത്ത പ്രശ്നം എന്തിനാണ് ചർച്ച ചെയ്യുന്നത്? സ്വരം കടുപ്പിച്ച് പിണറായി വിജയൻ

തിരുവനന്തപുരം : പ്രതിപക്ഷ ഉപനേതാവ് പദവി സംബന്ധിച്ച തർക്കങ്ങളുമായി ബന്ധപ്പെട്ട ചോദ്യങ്ങളോട് കടുത്ത സ്വരത്തിൽ പ്രതികരിച്ച് പ്രതിപക്ഷ നേതാവ് പിണറായി വിജയൻ. ഇല്ലാത്ത ഒരു പ്രശ്നം എന്തിനാണ് ചർച്ച ചെയ്യുന്നതെന്നും കേരളത്തിന്റെ ചരിത്രത്തിൽ ഇന്നുവരെ ഇങ്ങനെയൊരു പദവിയെച്ചൊല്ലി പ്രശ്നങ്ങളുണ്ടായിട്ടുണ്ടോ എന്നും പിണറായി ചോദിച്ചു. ഈ വിഷയത്തിൽ ആര് വിട്ടുവീഴ്ച ചെയ്യണം എന്നാണ് പറയുന്നതെന്നും താൻ മുമ്പ് പറഞ്ഞ നിലപാടിൽ തന്നെ ഉറച്ചുനിൽക്കുന്നുവെന്നും പിണറായി വിജയൻ തിരുവനന്തപുരത്ത് വ്യക്തമാക്കി. സിപിഐ സംസ്ഥാന സെക്രട്ടറി ബിനോയ് വിശ്ഭവുമായി ഇനിയും കാണുമെന്നും തമ്മിൽ കാണുന്നതിനോ ചർച്ചകൾ നടത്തുന്നതിനോ മറ്റ് പ്രശ്നങ്ങളൊന്നുമില്ലെന്നും അദ്ദേഹം കൂട്ടിച്ചേർത്തു.

പ്രതിപക്ഷ ഉപനേതാവ് പദവിയിൽ സിപിഐക്ക് വാശിയില്ലെന്ന് ബിനോയ് വിശ്വം വെള്ളിയാഴ്ച വ്യക്തമാക്കിയിരുന്നു. എന്നാൽ, എൽഡിഎഫിനകത്ത് വോട്ടെടുപ്പിലൂടെ തീരുമാനങ്ങൾ എടുക്കാൻ ശ്രമിക്കുന്നത് ആരോഗ്യകരമായ പ്രവണതയല്ലെന്നും അദ്ദേഹം അഭിപ്രായപ്പെട്ടു. സിപിഐയുടെ വാതിൽ എല്ലാക്കാലത്തും ചർച്ചയ്ക്കായി തുറന്നുവെച്ചിരിക്കുമെന്നും തങ്ങളുടെ ഏറ്റവും അടുത്ത സഖ്യകക്ഷിയായ സിപിയെമ്മിനെ കുറ്റപ്പെടുത്തില്ലെന്നും അദ്ദേഹം പറഞ്ഞു. നിലപാട് വ്യക്തമാക്കിയതുകൊണ്ട് ഘടകകക്ഷികൾ ശത്രുപക്ഷത്താവില്ലെന്നും രാഷ്ട്രീയപ്രശ്നങ്ങൾ രാഷ്ട്രീയമായിത്തന്നെ തീർക്കണമെന്നും ബിനോയ് വിശ്വം തിരുവനന്തപുരത്ത് മാധ്യമപ്രവർത്തകരോട് സംസാരിക്കവെ ചൂണ്ടിക്കാണിച്ചു. നേരത്തെ കണ്ണൂരിൽ വെച്ച് മാദ്ധ്യമപ്രവർത്തകരെ കണ്ടപ്പോഴും പ്രതിപക്ഷ ഉപനേതാവ് പദവിയുമായി ബന്ധപ്പെട്ട വിഷയം തീർന്നുവെന്നായിരുന്നു പിണറായി വിജയൻ വ്യക്തമാക്കിയിരുന്നത്. എന്നാൽ, പ്രതിപക്ഷ ഉപനേതാവ് സ്ഥാനത്തിൽ വിട്ടുവീഴ്ചയില്ലെന്ന് സിപിഐ നേതാവ് ഡി. രാജ കഴിഞ്ഞ ദിവസം പ്രഖ്യാപിച്ചിരുന്നു. ഇതിനെക്കുറിച്ച് മാദ്ധ്യമപ്രവർത്തകർ സൂചിപ്പിച്ചപ്പോഴാണ് കടുത്ത ഭാഷയിലുള്ള പ്രതിപക്ഷ നേതാവിന്റെ മറുപടി ഉണ്ടായത്. ഇതിൽ എന്ത് വിട്ടുവീഴ്ചയാണ് വേണ്ടതെന്നും ഇല്ലാത്ത ഒരു പ്രശ്നം ചർച്ച ചെയ്യണം എന്ന് പറയുന്നതിൽ എന്ത് യുക്തിയാണുള്ളതെന്നും പിണറായി വിജയൻ ചോദിച്ചു. തർക്കങ്ങൾ നിലനിൽക്കുന്നുണ്ടെങ്കിലും മുന്നണിയിലെ ചർച്ചകൾ സാധാരണ രീതിയിൽ തന്നെ മുന്നോട്ട് പോകുമെന്ന സൂചനയാണ് ഇരു നേതാക്കളുടെയും വാക്കുകൾ നൽകുന്നത്.