തെരച്ചിൽ ഇതുവരെയും അവസാനിപ്പിച്ചിട്ടില്ല ; കാര്യക്ഷമമായ തെരച്ചിലിന് ശേഷമാണ് സൈന്യത്തിന്റെ മടക്കം ! അഭിനന്ദിച്ച് മുഖ്യമന്ത്രി പിണറായി വിജയൻ

തിരുവനന്തപുരം : വയനാട് ദുരന്തമുഖത്ത് രാപകലില്ലാതെ രക്ഷാപ്രവർത്തനം നടത്തിയ സൈന്യത്തെ അഭിനന്ദിച്ച് മുഖ്യമന്ത്രി പിണറായി വിജയൻ. രക്ഷാപ്രവർത്തനത്തിനെത്തിയ കര, നാവിക സേനാം​ഗങ്ങളിൽ ഒരു വിഭാ​ഗം മടങ്ങിയിരിക്കുകയാണ്. മന്ത്രിമാരുടെ നേതൃത്വത്തിലാണ് ഇവർക്ക് യാത്രയയപ്പ് നൽകിയത്. കാര്യക്ഷമമായ തെരച്ചിലിന് ശേഷമാണ് സൈന്യം മടങ്ങുന്നതെന്നും മുഖ്യമന്ത്രി പിണറായി വിജയൻ അഭിനന്ദിച്ചു.

പ്രധാനമന്ത്രി നരേന്ദ്രമോദി ശനിയാഴ്ച വയനാട് എത്തും. വയനാട് ഉരുൾപൊട്ടൽ ദേശീയദുരന്തമായി പ്രഖ്യാപിക്കണമെന്ന് പ്രധാനമന്ത്രിയോട് ആവശ്യപ്പെടുമെന്നും മുഖ്യമന്ത്രി അറിയിച്ചു. കേന്ദ്ര സർക്കാരിന്റെ ഭാഗത്ത് നിന്നും അനുകൂല നിലപാടാണ് പ്രതീക്ഷിക്കുന്നതെന്നും കാര്യങ്ങൾ ബോധ്യപ്പെടുത്താൻ വിശദമായ കത്ത് കേരളം നൽകിയിട്ടുണ്ടെന്നും മുഖ്യമന്ത്രി പിണറായി വിജയൻ കൂട്ടിച്ചേർത്തു.

വയനാട് ദുരന്തത്തിൽ ഇതുവരെ 225 മരണങ്ങളാണ് ഔ​ദ്യോ​​ഗികമായി സ്ഥിരീകരിച്ചത്. 195 ശരീരഭാ​ഗങ്ങളും കണ്ടെത്തിയിട്ടുണ്ട്. ശരീരഭാ​ഗങ്ങളിൽ 90 ശതമാനമുണ്ടെങ്കിൽ മൃതദേഹമായി കണക്കാക്കുന്നതാണ്. 420 പോസ്റ്റ്മോർട്ടങ്ങളാണ് ഇതുവരെ നടത്തിയത്. ഇത് ശരീര ഭാഗങ്ങൾ ഉൾപ്പടെ ചേർത്തിട്ടുള്ള കണക്കാണെന്നും മുഖ്യമന്ത്രി വ്യക്തമാക്കി. അതേസമയം, തെരച്ചിൽ ഇതുവരെയും അവസാനിപ്പിച്ചിട്ടില്ല. നാളെ ജനകീയ തെരച്ചിൽ നടത്താനാണ് തീരുമാനം. ആരെയെങ്കിലും കണ്ടെത്താനാകുമോയെന്ന് അറിയാനുള്ള അവസാന ശ്രമമാണിത്. ക്യാമ്പിൽ കഴിയുന്നവരെയും ഒപ്പം ചേർക്കുമെന്നും കാണാതായവരുടെ ബന്ധുക്കൾക്കും തെരച്ചിലിൽ പങ്കെടുക്കാമെന്നും മുഖ്യമന്ത്രി പറഞ്ഞു.