സുഡാനിൽ യുദ്ധമുഖം വികസിക്കുന്നു!! അഞ്ച് ദിവസത്തിനിടെ പലായനം ചെയ്തത് 36,000-ത്തിലധികം പേർ ; കോർദോഫാൻ മേഖലയിലും ഇസ്‌ലാമിക തീവ്രവാദികൾ ആക്രമണം അഴിച്ചുവിടുമെന്ന് ആശങ്ക

പോർട്ട് സുഡാൻ:സുഡാനിൽ സൈന്യവും ഇസ്‌ലാമിക തീവ്രവാദികളായ റാപ്പിഡ് സപ്പോർട്ട് ഫോഴ്സസും (RSF) തമ്മിലുള്ള പോരാട്ടം വ്യാപിക്കുന്നതിനിടെ, ഡാർഫുറിന് കിഴക്കുള്ള കോർദോഫാൻ മേഖലയിലെ പട്ടണങ്ങളിൽ നിന്നും ഗ്രാമങ്ങളിൽ നിന്നും 36,000-ത്തിലധികം സാധാരണക്കാർ പലായനം ചെയ്തതായി യുഎൻ റിപ്പോർട്ട് ചെയ്തു. പുതിയ പോർമുഖത്തേക്ക് സേനയെ അണിനിരത്തുന്നതായി പാരാമിലിട്ടറി വിഭാഗവും മുന്നറിയിപ്പ് നൽകിയിട്ടുണ്ട്.

കഴിഞ്ഞ ഏതാനും ആഴ്ചകളായി മധ്യ കോർദോഫാൻ മേഖല, രണ്ട് വർഷത്തോളമായി തുടരുന്ന സംഘർഷത്തിന്റെ പുതിയ പോർക്കളമായി മാറിയിരിക്കുകയാണ്. സുഡാന്റെ തലസ്ഥാനമായ ഖാർത്തൂമിനും ഡാർഫൂർ പ്രവിശ്യകൾക്കും ഇടയിൽ തന്ത്രപ്രധാനമായ സ്ഥാനത്താണ് മധ്യ കോർദോഫാൻ സ്ഥിതിചെയ്യുന്നത്.

ഡാർഫൂറിലെ സൈന്യത്തിന്റെ അവസാന ശക്തികേന്ദ്രമായ എൽ-ഫാഷർ RSF പിടിച്ചെടുത്ത് ഒരാഴ്ചയിലധികം ആയതിന് പിന്നാലെയാണ് യുദ്ധം കൂടുതൽ മേഖലകളിലേക്ക് വ്യാപിക്കുന്നത്. പോർട്ട് സുഡാൻ ആസ്ഥാനമാക്കി പ്രവർത്തിക്കുന്ന സൈന്യത്തിനനുകൂലമായ സർക്കാരിനെതിരെ, RSF ഇവിടെ ഒരു സമാന്തര ഭരണ സംവിധാനം സ്ഥാപിച്ചിട്ടുണ്ട്.

ഒക്ടോബർ 26 നും 31 നും ഇടയിൽ വടക്കൻ കോർദോഫാനിലെ അഞ്ച് പ്രദേശങ്ങളിൽ നിന്നായി ഏകദേശം 36,825 പേർ പലായനം ചെയ്തതായി യുഎന്നിന്റെ മൈഗ്രേഷൻ ഏജൻസി ഞായറാഴ്ച രാത്രി പുറത്തിറക്കിയ പ്രസ്താവനയിൽ അറിയിച്ചു. വടക്കൻ കോർദോഫാനിലെ പട്ടണങ്ങളിലും ഗ്രാമങ്ങളിലും RSF ന്റെയും സൈന്യത്തിന്റെയും സേനാവിന്യാസം വർധിച്ചതായി പ്രദേശവാസികൾ വെളിപ്പെടുത്തി. ഡാർഫൂറിനെ ഖാർത്തൂമുമായി ബന്ധിപ്പിക്കുന്നതും വിമാനത്താവളമുള്ളതുമായ എൽ-ഒബെയ്ഡ് എന്ന തന്ത്രപ്രധാനമായ നഗരത്തിനായി ഇരു സൈന്യങ്ങളും പോരാട്ടം ശക്തമാക്കുകയാണ്. കഴിഞ്ഞ ആഴ്ച എൽ-ഒബെയ്ഡിന്റെ വടക്കുള്ള ബാര നഗരം RSF പിടിച്ചെടുത്തിരുന്നു.

സമൃദ്ധമായ വിഭവങ്ങളുള്ള കോർദോഫാൻ മേഖലയായിരിക്കും ഇനി സൈനിക ശ്രദ്ധയുടെ അടുത്ത കേന്ദ്രമെന്ന് യുഎൻ അസിസ്റ്റന്റ് സെക്രട്ടറി ജനറൽ മാർത്ത പോബി കഴിഞ്ഞ ആഴ്ച മുന്നറിയിപ്പ് നൽകിയിരുന്നു. RSF നടത്തുന്ന “വൻതോതിലുള്ള അതിക്രമങ്ങളെ” അവർ ചൂണ്ടിക്കാട്ടി. ഇവയിൽ പലപ്പോഴും വംശീയ ലക്ഷ്യങ്ങളോടെയുള്ള പ്രതികാര നടപടികളും ഉൾപ്പെടുന്നതായി അവർ പറഞ്ഞു.

എൽ-ഫാഷറിന്റെ പതനത്തിനുശേഷം ഡാർഫൂറിൽ അറബികളല്ലാത്ത സമൂഹങ്ങൾക്കെതിരെ RSF തീവ്രവാദികൾ നടത്തുന്ന കൂട്ടക്കൊലകളും ലൈംഗിക അതിക്രമങ്ങളും തട്ടിക്കൊണ്ടുപോകലുകളും കോർദോഫാനിൽ ആവർത്തിച്ചേക്കാമെന്നും അവർ ആശങ്ക പ്രകടിപ്പിച്ചു. വടക്കൻ കോർദോഫാനിൽ അടുത്തിടെയുണ്ടായ അക്രമങ്ങളിൽ റെഡ് ക്രസന്റ് വളണ്ടിയർമാർ ഉൾപ്പെടെ 50 സാധാരണക്കാർ കൊല്ലപ്പെട്ടതായി യുഎൻ പറയുന്നു.