യു_ ദ്ധം മുറുകുന്നു ; ഹമാസിനെ തകർത്ത് തരിപ്പണമാക്കാൻ ഇസ്രായേൽ !

ഇസ്രായേൽ – ഹമാസ് സംഘർഷം പതിനൊന്നാം ദിവസത്തിലേക്ക് കടക്കുമ്പോഴും യുദ്ധം രക്ത രൂക്ഷിതമായി തന്നെ തുടരുകയാണ്. അതിനിടെ ഹമാസിന്റെ ആക്രമണം ചെറുക്കാൻ പുതിയ പ്രതിരോധ സംവിധാനം വിന്യസിക്കാൻ ഇസ്രായേൽ തയാറെടുക്കുന്നതായാണ് പുറത്തുവരുന്ന റിപ്പോർട്ട്. ലേസർ ആയുധങ്ങൾ വിന്യസിക്കാനാണ് ഇസ്രായേൽ പ്രതിരോധ സേന നീക്കമിടുന്നത്. ആകാശമാർഗ്ഗമുള്ള ആക്രമണങ്ങളെ ചെറുക്കുന്ന അയൺ ബീം സ്ഥാപിക്കാനാണ് ഇസ്രയേലിന്റെ തീരുമാനം. ഇസ്രയേലിലേക്കു വരുന്ന റോക്കറ്റുകളും മിസൈലുകളും ഫൈബർ ലേസർ ഉപയോഗിച്ച് നശിപ്പിക്കാൻ അയൺ ബീമിന് സാധിക്കും. അതേസമയം, ഹമാസിനെതിരായ പോരാട്ടം കടുപ്പിച്ച സാഹചര്യത്തിലാണ് അതിർത്തിയിൽ അയൺ ബീം സ്ഥാപിക്കാൻ ഇസ്രായേൽ നിർണായക നീക്കം നടത്തുന്നത്.

വ്യോമാക്രമണത്തെ ഫലപ്രദമായി ചെറുക്കാൻ കഴിയുന്ന അയൺ ബീമുകൾ അടുത്ത വർഷത്തോടെ അതിർത്തിയിൽ വിന്യസിക്കാൻ ആയിരുന്നു ഇസ്രായേൽ പ്രതിരോധ സേന നിശ്ചയിച്ചിരുന്നത്. എന്നാൽ നിലവിലെ സാഹചര്യത്തിൽ ഉടൻ തന്നെ ഇവ വിന്യസിക്കാനാണ് ഇസ്രയേലിന്റെ തീരുമാനം. 2021 ജൂണിൽ വിമാനങ്ങളിൽ സ്ഥാപിച്ച കരുത്തുറ്റ ലേസർ സംവിധാനങ്ങൾ ഉപയോഗിച്ച് മിസൈലുകളെ ഇസ്രയേൽ തകർത്തിരുന്നു. 100 ശതമാനം വിജയമായിരുന്നു ഈ സംവിധാനം. ഇതിൽ ഉപയോഗിച്ചതു പോലെ 100 കിലോവാട്ട് പവറുള്ള കരുത്തേറിയ ലേസറാകും പുതിയ സംവിധാനത്തിലും ഉപയോഗിക്കുക. അതേസമയം, 2014 ലാണ് അയൺ ബീം പ്രതിരോധ സേനയുടെ ഭാഗമായത്. റഫേൽ അഡ്വാൻസ് സിസ്റ്റം ആണ് ഇതിന്റെ നിർമ്മാതാക്കൾ. ശക്തിയേറിയ പ്രകാശ ബീമുകൾ കൊണ്ടാണ് ഇവ ശത്രുക്കളെ നേരിടുക. അതേസമയം, നിലവിൽ അയൺ ഡോം ഉപയോഗിച്ചാണ് ഇസ്രായേൽ വ്യോമാക്രമണങ്ങൾ പ്രതിരോധിക്കുന്നത്. എന്നാൽ നിലവിലെ സാഹചര്യത്തിൽ ഇതിന് ചില പോരായ്മകൾ ഉണ്ടെന്നാണ് പുറത്തുവരുന്ന വിവരം. ഇതേ തുടർന്നാണ് അയൺ ബീം ഉടനെ വിന്യസിക്കാൻ തീരുമാനിച്ചത്. ഇതിന് മുന്നോടിയായി ചില പരീക്ഷണങ്ങൾ പൂർത്തിയാക്കാനുണ്ട്. ഇവ ദ്രുതഗതിയിൽ പൂർത്തിയാക്കുകയാണെന്നാണ് പുറത്തുവരുന്ന വിവരം.

അതേസമയം, ഹമാസിനെതിരായ ആക്രമണം കടുപ്പിക്കുന്നതിനിടെ, ലബനനിലെ ഹിസ്ബുല്ല കേന്ദ്രങ്ങളിലേക്കും വ്യോമാക്രമണം അഴിച്ചുവിട്ടിരിക്കുകയാണ് ഇസ്രയേൽ. ഇന്നലെ അർധരാത്രിയോടെ ഹിസ്ബുല്ല കേന്ദ്രങ്ങൾ ലക്ഷ്യമാക്കി വ്യോമാക്രമണം നടത്തിയതായി ഇസ്രയേൽ സേന വ്യക്തമാക്കി. ലബനൻ മേഖലയിലെ ഹിസ്ബുല്ലയുടെ സായുധ കേന്ദ്രങ്ങളാണ് ഇസ്രയേൽ സേനയുടെ ലക്ഷ്യം. ഇസ്രയേൽ കരയുദ്ധം ആരംഭിച്ചാൽ ഹമാസിനൊപ്പം ചേരുമെന്ന് ഇറാന്റെ പിന്തുണയുള്ള ഹിസ്ബുല്ല നേരത്തെ അറിയിച്ചിരുന്നു. അതിനു പിന്നാലെ ഇസ്രയേൽ–ലബനൻ അതിർത്തിയിൽ താമസിക്കുന്ന ആയിരക്കണക്കിന് ആളുകളെ ഇസ്രയേൽ ഒഴിപ്പിച്ചിരുന്നു. ഹമാസിനെതിരെ ഇസ്രയേൽ പ്രത്യാക്രമണം ആരംഭിച്ചതിനു പിന്നാലെ വടക്കൻ ഇസ്രയേലിലെ ഒരു ടാങ്ക് വ്യൂഹത്തിനെതിരെ ഹിസ്ബുല്ല റോക്കറ്റ് ആക്രമണം നടത്തുകയും ഹിസ്ബുല്ലയുടെ ഒരു താവളത്തിലേക്ക് ഇസ്രയേൽ ഡ്രോൺ ആക്രമണം നടത്തുകയും ചെയ്തിരുന്നു. ഇസ്രയേലിനെ ആക്രമിച്ചാൽ കനത്ത തിരിച്ചടി നേരിടേണ്ടി വരുമെന്ന് ഇറാനും ഹിസ്ബുല്ലയ്ക്കും പ്രധാനമന്ത്രി ബെന്യാമിൻ നെതന്യാഹു മുന്നറിയിപ്പ് നൽകിയതിനു പിന്നാലെയാണ് ആക്രമണം ഉണ്ടായിരിക്കുന്നത്.