അടയ്ക്ക മോഷണം ആരോപിച്ച് തൃശൂരിലെ ആൾക്കൂട്ട മർദ്ദനം;യുവാവിന്റെ ആരോഗ്യനില ഗുരുതരമായി തുടരുന്നു

തൃശ്ശൂർ :അടയ്ക്ക മോഷണം ആരോപിച്ച് തൃശൂരിലെ ആൾക്കൂട്ട മർദ്ദനത്തിനിരയായ യുവാവിന്റെ ആരോഗ്യനില ഗുരുതരമായി തുടരുകയാണ്.വെട്ടിക്കാട്ടിരി സ്വദേശി സന്തോഷ് ആണ് ആൾക്കൂട്ടത്തിന്റെ ക്രൂര മര്‍ദ്ദനത്തിനിരയായത്. സംഭവം നടന്ന വീടിന്റെ ഉടമയും അടയ്ക്ക വ്യാപാരിയുമായ അബ്ബാസ്, സഹോദരൻ ഇബ്രാഹിം, ബന്ധുവായ അൽത്താഫ്, അയൽവാസി കബീർ എന്നിവരെ ഇന്നലെ പോലീസ് അറസ്റ്റ് ചെയ്തിരുന്നു.

അടയ്ക്ക മോഷ്ടിക്കാന്‍ ശ്രമിക്കുമ്പോഴാണ് വീട്ടുകാരും നാട്ടുകാരും ചേര്‍ന്ന് സന്തോഷിനെ പിടികൂടിയത് എന്നാണ് അറിയാൻ സാധിക്കുന്നത്. സന്തോഷിനെ കെട്ടിയിട്ട് മര്‍ദിച്ചതിന്റെ ചിത്രങ്ങള്‍ പൊലീസിന് ലഭിച്ചു. മർദ്ദനത്തിൽ ഗുരുതരമായി പരിക്കേറ്റ ഇയാൾ നിലവിൽ തൃശൂർ മുളങ്കുന്നത്തുകാവ് മെഡിക്കൽ കോളജ് ആശുപത്രിയിൽ ചികിത്സയിലാണ്. ശസ്ത്രക്രിയയ്ക്ക് വിധേയനായ സന്തോഷ് നിലവിൽ ഐസിയുവിലാണ്. ഇയാൾ ഇതുവരെ അപകടനില തരണം ചെയ്തിട്ടില്ല എന്നാണ് വിവരം.