ദില്ലി: തോൽപ്പിക്കാൻ സാധിക്കാത്തവരെ അധിക്ഷേപിക്കുക കോൺഗ്രസിന്റെ സ്വഭാവമാണെന്നും എന്നാൽ ജനപിന്തുണ മോദിക്കൊപ്പമാണെന്നും കേന്ദ്ര ധനകാര്യ മന്ത്രി നിർമലാ സീതാരാമൻ. മൻ കി ബാത്തിനെ കുറിച്ചുള്ള കോൺഗ്രസിന്റെ വിമർശനങ്ങൾക്ക് മറുപടി പറയുകയായിരുന്നു ധനമന്ത്രി. “മോദി ജനങ്ങളോട് സംസാരിച്ചത് ഒരു ‘പ്രധാന സേവകനെ’ പോലെയാണ് ഒരു പ്രധാനമന്ത്രിയെപ്പോലെയല്ല, സാധാരണക്കാരുടെ കാതലായ വിഷയങ്ങളെക്കുറിച്ച് ആത്മവിശ്വാസത്തോടെ സംസാരിച്ചു.”- നിർമ്മല സീതാരാമൻ പറഞ്ഞു. “2020-ൽ കൊവിഡ്-19 വ്യാപിച്ചതും പിന്നീട് റഷ്യ-ഉക്രെയ്ൻ (സംഘർഷം) കാരണവും ഉണ്ടായ പ്രശ്നങ്ങൾക്കിടയിലും ഇത്തരമൊരു പ്രധാൻ സേവകൻ നമ്മുടെ രാജ്യത്തെ നയിക്കുന്നു. അദ്ദേഹത്തിന്റെ നേതൃത്വത്തിൽ നാമെല്ലാവരും സുരക്ഷിതരാണ്, ഇന്ന് അതിവേഗം വളരുന്ന സമ്പദ്വ്യവസ്ഥയാണ് ഇന്ത്യ.” മന്ത്രി കൂട്ടിച്ചേർത്തു.
‘മൻ കി ബാത്ത്’ 100 എപ്പിസോഡുകൾ പൂർത്തിയാക്കിയപ്പോൾ, നിർണായക വിഷയങ്ങളിൽ പ്രധാനമന്തി മൗനം പാലിക്കുന്നതായി കോൺഗ്രസ് ആരോപിച്ചിരുന്നു. ചൈന അതിർത്തി തർക്കം , അദാനി, വർദ്ധിച്ചുവരുന്ന സാമ്പത്തിക അസമത്വങ്ങൾ, ഗുസ്തി താരങ്ങളുടെ പ്രതിഷേധം തുടങ്ങിയ നിർണായക വിഷയങ്ങളിൽ മൗൻ കി ബാത്ത് (മൗനം) ആണെന്ന് കോൺഗ്രസ് നേതാവ് ജയറാം രമേശ് പറഞ്ഞിരുന്നു. എന്നാൽ ‘മൻ കി ബാത്തിലൂടെ’ പ്രധാനമന്ത്രി ഇന്ത്യൻ പൗരന്മാരിലെ നന്മ പുറത്തുകൊണ്ടുവന്നതായി സീതാരാമൻ പറഞ്ഞു. കോൺഗ്രസിന്റെ വിമർശനങ്ങളിൽ കഴമ്പില്ല. അവർ പ്രധാനമന്ത്രിയെ എത്രത്തോളം കുറ്റപ്പെടുത്തുന്നുവോ അത്രയധികം ആളുകൾ അദ്ദേഹത്തെ അനുഗ്രഹിക്കുമെന്നും അവർ കൂട്ടിച്ചേർത്തു.
