കത്തുന്ന ചൂട് ;വേനൽക്കാലത്ത് സൂക്ഷിക്കണം, ഈ 4 ചേരുവകളെ,അറിയേണ്ടതെല്ലാം

ഓരോ ദിവസം കഴിയുന്തോറും ചൂടിന്റെ കാഠിന്യം കൂടിവരികയുമാണ്.കാലാവസ്ഥയ്ക്ക് അനുയോജ്യമായി കഴിക്കുന്ന ഭക്ഷണത്തിലും മാറ്റം വരുത്തേണ്ടതുണ്ട്. വയറിനെ തണുപ്പിക്കുന്ന ഭക്ഷണങ്ങൾ വേണം വേനൽക്കാലത്ത് ഡയറ്റിൽ ഉൾപ്പെടുത്താൻ. അതുപൊലെതന്നെ പാചകം ചെയ്യുമ്പോൾ ചില സു​ഗന്ധവ്യഞ്ജനങ്ങളോട് താത്കാലികമായി വിട പറയുകയും വേണം. വേനൽക്കാലത്ത് ഒഴിവാക്കേണ്ടവ അറിയാം

കുരുമുളക് പൊടി

കുരുമുളകുപൊടി ചേർത്ത് തയ്യാറാക്കുന്ന വിഭവങ്ങൾക്ക് ഒരു പ്രത്യേക രുചി തന്നെയാണ്. നമ്മൾ മലയാളികളുടെ പല നാടൻ വിഭവങ്ങളിലും കുരുമുളകുപൊടി ഒരു പ്രധാന ചേരുവയുമാണ്. പക്ഷെ ഇത് വേനൽക്കാലത്തിന് അത്ര യോജിച്ചതല്ല. ശരീരത്തിന്റെ താപനില കൂട്ടുമെന്നതിനാൽ കുരുമുളകുപൊടി തണുപ്പ് കാലാവസ്ഥയിൽ ഉപയോ​ഗിക്കേണ്ട ചേരുവയാണ്.

മുളകുപൊടി

ഭക്ഷണത്തിന് രുപിയും നിറവും നൽകുന്നതാണ് മുളകുപൊടി. നമ്മൾ തയ്യാറാക്കുന്ന എല്ലാ വിഭവത്തിലും മുളകുപൊടി ഉപയോ​ഗിക്കാറുണ്ടെങ്കിലും ഇതും ശരീരത്തിൽ താപനില കൂടാൻ കാരണമാകുമെന്ന കാര്യം മറക്കരുത്. ഇത് ശരീരത്തിൽ സൂര്യാഘാതം ഏൽക്കാനുള്ള സാധ്യത പോലും വർദ്ധിപ്പിക്കും. മുളകുപൊടി പരമാവധി ഒഴിവാക്കുകയോ വളരെ ചെറിയ അളവിൽ മാത്രം ഉപയോ​ഗിക്കാൻ ശ്രദ്ധിക്കുകയും വേണം.

വെളുത്തുള്ളി

ഭക്ഷണത്തിന് ഒരു പ്രത്യേക രുചി പകരാൻ അൽപം വെളുത്തുള്ളി ഉപയോ​ഗിച്ചാൽ മതിയെന്ന കാര്യത്തിൽ സംശയമൊന്നുമില്ല. പക്ഷെ, വേനൽക്കാലത്ത് സൂക്ഷിക്കണം!. വെളുത്തുള്ളിയുടെ ഉപയോ​ഗം ശരീരോഷ്മാവ് കൂട്ടുകയും അമിതമായി വിയർക്കാൻ കാരണമാകുകയും ചെയ്യും. ദിവസവും ഒന്നോ രണ്ടോ അല്ലി വെളുത്തുള്ളി ഉപയോ​ഗിക്കുന്നതിൽ കുഴപ്പമില്ല. അമിതമായാൾ ശരീരത്തിന് ​ഗുണത്തേക്കാളേറെ ദോഷമുണ്ടാക്കും.

ഇഞ്ചി

ഇഞ്ചിക്ക് ഒരുപാട് ആരോ​ഗ്യ​ഗുണങ്ങളുണ്ടെന്നത് ശരിയാണ്, പക്ഷെ, വേനൽക്കാലത്ത് ഇത് അമിതമായി കഴിക്കുന്നത് നല്ലതല്ല. ഇഞ്ചി നിങ്ങളുടെ ശരീരത്തെ കൂടുതൽ ചൂടാക്കും. വയറിന് ബുദ്ധിമുട്ട് തോന്നാനും അമിതമായി വിയർക്കാനുമെല്ലാം ഇത് കാരണമാകുകയും ചെയ്യും.