പുസ്തകങ്ങളിലെ പാഠങ്ങൾ പഠിച്ചെടുക്കുന്നതിൽ ബുദ്ധിമുട്ട് നേരിടുന്നുണ്ടെങ്കിലും റാഫേൽ വിമാനങ്ങൾ അഴിക്കാൻ മിടുക്കർ, ന്യൂനപക്ഷ വിദ്യാർത്ഥികളെക്കുറിച്ച് വിവാദ പരാമർശവുമായി തെലങ്കാന മുഖ്യമന്ത്രി രേവന്ത് റെഡ്ഡി! രൂക്ഷവിമർശനവുമായി ബിജെപി

ഹൈദരാബാദ് : പുസ്തകങ്ങളിലെ പാഠങ്ങൾ പഠിച്ചെടുക്കുന്നതിൽ ബുദ്ധിമുട്ട് നേരിടുന്നുണ്ടെങ്കിലും, അവസരം ലഭിച്ചാൽ ന്യൂനപക്ഷ വിഭാഗങ്ങളിലെ വിദ്യാർത്ഥികൾക്ക് റാഫേൽ യുദ്ധവിമാനങ്ങൾ അഴിച്ചെടുക്കാനും കൂട്ടിച്ചേർക്കാനും കഴിയുമെന്ന തെലങ്കാന മുഖ്യമന്ത്രി എ. രേവന്ത് റെഡ്ഡിയുടെ പരാമർശത്തിൽ വിവാദം. ഹൈദരാബാദിലെ ആദിവാസി ഭവനിൽ നടന്ന ന്യൂനപക്ഷ എക്സലൻസ് ഉച്ചകോടിയെ അഭിസംബോധന ചെയ്തു സംസാരിക്കവെയാണ് തെലുങ്കാന മുഖ്യമന്ത്രിയുടെ വിവാദ പ്രസ്താവന. ന്യൂനപക്ഷ സമൂഹത്തിലെ കുട്ടികളെ ‘നൈപുണ്യത്തൊഴിലാളികൾ’ എന്ന് വിശേഷിപ്പിച്ച അദ്ദേഹം, അവരുടെ വിദ്യാഭ്യാസ പുരോഗതിക്കായി സർക്കാർ നടപ്പിലാക്കുന്ന വിവിധ ക്ഷേമ പദ്ധതികളെക്കുറിച്ചും സംസാരിച്ചു.

മുഖ്യമന്ത്രിയുടെ ഈ പരാമർശങ്ങൾക്കെതിരെ ഭാരതീയ ജനതാ പാർട്ടി രംഗത്തെത്തി. നിയമം നടപ്പിലാക്കാൻ കഴിയുന്നില്ലെങ്കിൽ മുഖ്യമന്ത്രി പദവിയിൽ തുടരാൻ രേവന്ത് റെഡ്ഡിക്ക് അർഹതയില്ലെന്നും, വോട്ടുബാങ്ക് ലക്ഷ്യമിട്ടുള്ള പ്രീണന രാഷ്ട്രീയമാണ് കോൺഗ്രസ് സർക്കാർ നടപ്പിലാക്കുന്നതെന്നും തെലങ്കാന ബിജെപി സെക്രട്ടറി തുള വീരേന്ദർ ഗൗഡ് ആരോപിച്ചു. പഴയ നഗരത്തിൽ ബില്ലുകൾ അടക്കാത്തവർക്കെതിരെ നടപടി സ്വീകരിക്കാതെ സൗജന്യങ്ങൾ നൽകുന്നത് ഭരണഘടനാ വിരുദ്ധമാണെന്നും അദ്ദേഹം കുറ്റപ്പെടുത്തി. മുമ്പും കോൺഗ്രസ് സർക്കാരുകൾ ന്യൂനപക്ഷങ്ങൾക്ക് പ്രത്യേക സംവരണങ്ങളും ആനുകൂല്യങ്ങളും നൽകിയിട്ടുണ്ടെങ്കിലും, പുതിയ പ്രസ്താവന സംസ്ഥാനത്ത് ഭരണപക്ഷവും പ്രതിപക്ഷവും തമ്മിലുള്ള രാഷ്ട്രീയ പോര് കൂടുതൽ കടുപ്പിച്ചിരിക്കുകയാണ്.