അധികാരത്തിനായി ‘കടുംപിടുത്തം’; വഴങ്ങാതെ ചെന്നിത്തല, ആഭ്യന്തരം തന്നെ ആവശ്യപ്പെട്ടേക്കും ! കോൺഗ്രസിൽ അനിശ്ചിതത്വം തുടരുന്നു

തിരുവനന്തപുരം :മുഖ്യമന്ത്രി പ്രഖ്യാപനത്തിന് പിന്നാലെ കേരള കോൺഗ്രസിൽ പുകയുന്ന ആഭ്യന്തര കലഹം പുതിയ തലങ്ങളിലേക്ക് കടക്കുന്നു. വി.ഡി. സതീശനെ മുഖ്യമന്ത്രിയായി ഹൈക്കമാൻഡ് നിശ്ചയിച്ചതിലുള്ള അമർഷം പരസ്യമാക്കിയ മുതിർന്ന നേതാവ് രമേശ് ചെന്നിത്തലയെ അനുനയിപ്പിക്കാനുള്ള ശ്രമങ്ങൾ ഊർജ്ജിതമാണെങ്കിലും, കടുത്ത ഉപാധികളാണ് ചെന്നിത്തല പക്ഷം മുന്നോട്ടുവെക്കുന്നത്. ഭരണത്തിന്റെ ആദ്യഘട്ടത്തിൽ തന്നെ ജനക്ഷേമകരമായ പ്രവർത്തനങ്ങളിൽ ശ്രദ്ധ കേന്ദ്രീകരിക്കുന്നതിന് പകരം പദവികൾക്കും വകുപ്പുകൾക്കും വേണ്ടിയുള്ള വടംവലിയിലാണ് കോൺഗ്രസ് നേതൃത്വം ഇപ്പോഴും തങ്ങിനിൽക്കുന്നത്.

മന്ത്രിസഭയിലേക്ക് വരണമെങ്കിൽ ആഭ്യന്തര വകുപ്പ് തന്നെ വേണമെന്ന ചെന്നിത്തലയുടെ ആവശ്യം പുതിയ സർക്കാരിന് വലിയ വെല്ലുവിളിയാണ് ഉയർത്തുന്നത്. ഇതിനുപുറമെ തന്റെ വിശ്വസ്തനായ ജോസഫ് വാഴയ്ക്കനെ കെ.പി.സി.സി. പ്രസിഡന്റാക്കണമെന്ന ഉപാധിയും അദ്ദേഹം മുന്നോട്ടുവെച്ചതായാണ് സൂചന. അണികൾക്കിടയിൽ ഐക്യത്തിന്റെ സന്ദേശം നൽകേണ്ട മുതിർന്ന നേതാക്കൾ തന്നെ അധികാര വീതംവെപ്പിനായി ഗ്രൂപ്പ് കളി തുടരുന്നത് പാർട്ടിയുടെ പ്രതിച്ഛായയ്ക്ക് മങ്ങലേൽപ്പിക്കുന്നു. നിയുക്ത മുഖ്യമന്ത്രി വി.ഡി. സതീശൻ ചെന്നിത്തലയെ കാണാൻ എത്തുന്നതിന് തൊട്ടുമുമ്പ് അദ്ദേഹം വീട്ടിൽ നിന്ന് ഇറങ്ങിപ്പോയത് നേതൃത്വത്തോടുള്ള കടുത്ത പ്രതിഷേധത്തിന്റെ ഭാഗമായാണ് വിലയിരുത്തപ്പെടുന്നത്.

ഭരണസിരാകേന്ദ്രമായ തിരുവനന്തപുരത്ത് തിരിച്ചെത്തിയ ചെന്നിത്തല മാധ്യമങ്ങൾക്ക് മുന്നിൽ ഹൈക്കമാൻഡ് തീരുമാനത്തെ സ്വാഗതം ചെയ്യുന്നുവെന്ന് പരോക്ഷമായി പറയുമ്പോഴും, പ്രവൃത്തിയിൽ നിസ്സഹകരണത്തിന്റെ പാതയിലാണ്. മന്ത്രിസഭയിൽ ചേരുന്ന കാര്യത്തിൽ അദ്ദേഹം പുലർത്തുന്ന മൗനം രാഷ്ട്രീയ വിലപേശലിന്റെ ഭാഗമാണ്. അൻവർ സാദത്ത്, ജോസഫ് വാഴയ്ക്കൻ തുടങ്ങിയ തന്റെ വിശ്വസ്തരെ കൂട്ടുപിടിച്ച് സതീശൻ ക്യാമ്പിന് മേൽ സമ്മർദ്ദം ചെലുത്താനാണ് ഐ ഗ്രൂപ്പ് നീക്കം. ജനവിധി മാനിച്ചു മുന്നോട്ട് പോകുന്നതിന് പകരം ഗ്രൂപ്പ് താല്പര്യങ്ങൾ സംരക്ഷിക്കാനുള്ള ഈ നീക്കങ്ങൾ കോൺഗ്രസിനുള്ളിലെ ഐക്യമെന്ന അവകാശവാദം വെറും പൊള്ളയാണെന്ന് ഒരിക്കൽ കൂടി തെളിയിക്കുന്നു. വരും ദിവസങ്ങളിൽ വകുപ്പ് വിഭജനത്തെച്ചൊല്ലി കോൺഗ്രസിൽ പടലപ്പിണക്കം കൂടുതൽ രൂക്ഷമാകാനാണ് സാധ്യത.