എതിര്‍പ്പുകള്‍ക്ക് പുല്ലുവില: ഒന്നേകാല്‍ കോടി ചെലവില്‍ കോളേജ് യൂണിയന്‍ ചെയര്‍മാന്‍മാരുടെ യുകെ യാത്ര

തിരുവനന്തപുരം: എതിര്‍പ്പുകള്‍ തള്ളി കോളേജ് യൂണിയന്‍ ചെയര്‍മാന്‍മാരുടെ യുകെ പരിശീലനവുമായി സര്‍ക്കാര്‍ മുന്നോട്ട്. യാത്രക്കായി തിരഞ്ഞെടുക്കപ്പെട്ട 59 സര്‍ക്കാര്‍ കോളേജ് ചെയര്‍മാന്‍മാരുടെ പട്ടിക പുറത്തിറക്കി. രണ്ട് സംഘമായി അടുത്തമാസമാണ് ഒന്നേകാല്‍ കോടി ചെലവിട്ടുള്ള യാത്രയും പരിശീലനവും.

സാമ്പത്തിക പ്രതിസന്ധിക്കിടെ കോളേജ് യൂണിയന്‍ ചെയര്‍മാന്മാരെ കാര്‍ഡിഫ് സര്‍വ്വകലാശാലയില്‍ സര്‍ക്കാര്‍ ചെലവിലാണ് പരിശീലനത്തിന് അയയ്ക്കുന്നത്. ധൂര്‍ത്തെന്ന് പറഞ്ഞ് പ്രതിപക്ഷം നീക്കത്തെ എതിര്‍ത്തെങ്കിലും പിന്മാറില്ലെന്ന് ഉന്നത വിദ്യാഭ്യാസമന്ത്രി കെ.ടി.ജലീല്‍ വ്യക്തമാക്കിയിരുന്നു.

ആകെയുള്ള 66 സര്‍ക്കാര്‍ കോളേജുകളില്‍ നിന്നും 54 കോളേജുകളിലെ ചെയര്‍മാന്‍മാരെ തിരഞ്ഞെടുത്തു. ഒപ്പം കണ്ണൂര്‍, എംജി, കുസാറ്റിലെ ലീഗല്‍ സ്റ്റഡീസ്, നിയമസര്‍വ്വകലാശാല, മലയാള സര്‍വ്വകലാശാല ചെയര്‍മാന്‍മാരും. മാര്‍ച്ച് രണ്ട് മുതല്‍ 6 വരെ 30 പേരടങ്ങുന്ന സംഘവും 23 മുതല്‍ 27 വരെ രണ്ടാം സംഘവും ബ്രിട്ടനിലേക്ക് പറക്കും.

ഉന്നത വിദ്യാഭ്യാസ പ്രിന്‍സിപ്പില്‍ സെക്രട്ടറി ഉഷാ ടൈറ്റസാണ് സംഘത്തിന് നേതൃത്വം നല്‍കുന്നത്. കോളേജ് വിദ്യാഭ്യാസ ഡയറക്ടറും തിരഞ്ഞെടുത്ത കോളേജിലെ അധ്യാപകരും അടക്കം ആകെ 65 പേര്‍.

തിരുവനന്തപുരം യൂണിവേഴ്‌സിറ്റി കോളേജ് ചെയര്‍മാന്‍ പട്ടികയില്‍ ഇല്ല. കൃത്യസമയത്ത് അപേക്ഷിക്കാത്തത് കൊണ്ടാണോ കേസ് ഉള്ളതു കൊണ്ടാണോ എന്ന് വ്യക്തമല്ല. കോളേജ് വിദ്യാഭ്യാസവകുപ്പിന്റെ ഫ്‌ളെയര്‍ എന്ന പരിശീനത്തിന്റെ ഭാഗമായാണ് യാത്ര.