അമ്മാൻ: ത്രിരാഷ്ട്ര സന്ദർശനത്തിന്റെ ഭാഗമായി പ്രധാനമന്ത്രി നരേന്ദ്രമോദി ജോർദാനിലെത്തി. ജോർദാൻ പ്രധാനമന്ത്രി ജാഫർ ഹസ്സൻ വിമാനത്താവളത്തിൽ വെച്ച് അദ്ദേഹത്തിന് ഊഷ്മളമായ സ്വീകരണം നൽകി. ഇന്ത്യ – ജോർദാൻ നയതന്ത്ര ബന്ധം സ്ഥാപിതമായതിൻ്റെ 75-ാം വാർഷികത്തിൻ്റെ പശ്ചാത്തലത്തിലാണ് ഈ സന്ദർശനം എന്നതും ശ്രദ്ധേയമാണ്.
“അമ്മാനിൽ എത്തി. വിമാനത്താവളത്തിൽ നൽകിയ ഊഷ്മളമായ സ്വീകരണത്തിന് ജോർദാൻ പ്രധാനമന്ത്രി ജാഫർ ഹസ്സനോട് നന്ദി പറയുന്നു. ഈ സന്ദർശനം നമ്മുടെ രാജ്യങ്ങൾ തമ്മിലുള്ള ഉഭയകക്ഷി ബന്ധങ്ങളെ കൂടുതൽ ശക്തിപ്പെടുത്തുമെന്ന് എനിക്ക് ഉറപ്പുണ്ട്,” പ്രധാനമന്ത്രി മോദി എക്സിൽ കുറിച്ചു.
ജോർദാൻ ഭരണാധികാരി കിംഗ് അബ്ദുല്ല രണ്ടാമൻ ഇബ്ൻ അൽ ഹുസൈൻ്റെ ക്ഷണപ്രകാരമാണ് മോദി ജോർദാൻ സന്ദർശിക്കുന്നത്. ഇന്ത്യ-ജോർദാൻ ബന്ധങ്ങളുടെ മുഴുവൻ മേഖലകളും അവലോകനം ചെയ്യുന്നതിനും പ്രാദേശിക വിഷയങ്ങളിലെ കാഴ്ചപ്പാടുകൾ കൈമാറുന്നതിനും സന്ദർശന വേളയിൽ ചർച്ചകൾ നടക്കും. പ്രധാനമന്ത്രി രാജ്യത്തെ ഇന്ത്യൻ പ്രവാസികളുമായി കൂടിക്കാഴ്ച നടത്തുകയും ഇന്ത്യ-ജോർദാൻ ബിസിനസ് ഫോറത്തിൽ സംസാരിക്കുകയും ചെയ്യും.
“ഈ ചരിത്രപരമായ സന്ദർശനം നമ്മുടെ ഇരു രാജ്യങ്ങളും തമ്മിലുള്ള നയതന്ത്ര ബന്ധം സ്ഥാപിച്ചതിൻ്റെ 75 വർഷം അടയാളപ്പെടുത്തുന്നു. സന്ദർശന വേളയിൽ, ജോർദാൻ പ്രധാനമന്ത്രി ജാഫർ ഹസ്സൻ, കിംഗ് അബ്ദുള്ള രണ്ടാമൻ എന്നിവരുമായി ഞാൻ വിശദമായ ചർച്ചകൾ നടത്തും. കിരീടാവകാശി അൽ ഹുസൈൻ ബിൻ അബ്ദുല്ല രണ്ടാമനുമായും കൂടിക്കാഴ്ച പ്രതീക്ഷിക്കുന്നു. ജോർദാൻ-ഇന്ത്യ ബന്ധങ്ങൾക്ക് കാര്യമായ സംഭാവന നൽകിയിട്ടുള്ള ഇന്ത്യൻ സമൂഹവുമായും ഞാൻ കൂടിക്കാഴ്ച നടത്തും,” പ്രധാനമന്ത്രി തൻ്റെ യാത്രാ പ്രസ്താവനയിൽ അറിയിച്ചു.
പൂർണ്ണമായ ഉഭയകക്ഷി സന്ദർശനം 37 വർഷത്തെ ഇടവേളയ്ക്ക് ശേഷമാണ് നടക്കുന്നതെന്നതാണ് ഈ യാത്രയുടെ പ്രധാന സവിശേഷതയെന്ന് വിദേശകാര്യ മന്ത്രാലയം അറിയിച്ചു. ഇരു രാജ്യങ്ങളും തമ്മിലുള്ള നയതന്ത്ര ബന്ധം സ്ഥാപിച്ചതിൻ്റെ 75-ാം വാർഷികവുമായാണ് ഇത് ഒത്തുപോകുന്നത്.
ഇന്ത്യയും ജോർദാനും തമ്മിൽ 2.8 ബില്യൺ ഡോളറിൻ്റെ ശക്തമായ ഉഭയകക്ഷി വ്യാപാര ബന്ധമുണ്ട്. വളങ്ങൾ, ഫാർമസ്യൂട്ടിക്കൽസ്, തുണിത്തരങ്ങൾ, ഊർജ്ജം തുടങ്ങിയ മേഖലകളിലാണ് ഇരുരാജ്യങ്ങളും പ്രധാനമായും ശ്രദ്ധ കേന്ദ്രീകരിക്കുന്നത്. പ്രധാനമന്ത്രി ഉന്നത ഉദ്യോഗസ്ഥരുമായി നടത്തുന്ന ചർച്ചകളിൽ വ്യാപാര-നയതന്ത്ര ബന്ധങ്ങൾ പ്രധാന വിഷയമായേക്കും. ഭീകരവാദ വിരുദ്ധ പ്രവർത്തനം, പ്രാദേശിക സ്ഥിരത, സാമ്പത്തിക സഹകരണം എന്നിവ ചർച്ചാ വിഷയമായേക്കും. നിക്ഷേപം വർദ്ധിപ്പിക്കുന്നതിനും പുനരുപയോഗ ഊർജ്ജ സഹകരണം പ്രോത്സാഹിപ്പിക്കുന്നതിനുമായി പ്രധാനമന്ത്രി മോദിയും കിംഗ് അബ്ദുല്ല രണ്ടാമനും ഒരു ബിസിനസ് പരിപാടിയെ അഭിസംബോധന ചെയ്യും.
