വാഷിംഗ്ടൺ ഡി സി : യുക്രെയ്ൻ പ്രസിഡന്റ് വ്ളാഡിമിർ സെലെൻസ്കിക്കെതിരെ നിലപാട് കടുപ്പിച്ച് ഡൊണാൾഡ് ട്രമ്പ് . സെലെൻസ്കി വിചാരിച്ചാൽ റഷ്യമായുള്ള യുദ്ധം ഉടൻ അവസാനിപ്പിക്കാൻ കഴിയുമെന്ന് ട്രമ്പ് വ്യക്തമാക്കി. ക്രിമിയ റഷ്യ വിട്ടു തരില്ല. നാറ്റോ സഖ്യത്തിൽ ചേരാനുള്ള ആഗ്രഹം യുക്രെയ്ൻ ഉപേക്ഷിക്കണമെന്നും ട്രമ്പ് വ്യക്തമാക്കി.സെലെൻസ്കി ഇന്ന് വൈറ്റ് ഹൗസിൽ കൂടിക്കാഴ്ചയ്ക്ക് എത്താനിരിക്കെയാണ് ട്രമ്പിന്റെ പുതിയ നിലപാട്. കൂടിക്കാഴ്ചയിൽ യൂറോപ്യൻ നേതാക്കളും പങ്കെടുക്കുമെന്നാണ് വിവരം.
“സെലെൻസ്കിക്ക് വേണമെങ്കിൽ റഷ്യയുമായുള്ള യുദ്ധം ഉടൻ അവസാനിപ്പിക്കാം, അല്ലെങ്കിൽ പോരാട്ടം തുടരാം. ഇതെല്ലാം എങ്ങനെ ആരംഭിച്ചുവെന്ന് ഓർക്കുക. ഒബാമ നൽകിയ ക്രിമിയ തിരികെ നൽകില്ല, ഉക്രെയ്നിന് നാറ്റോയിൽ ചേരാനും കഴിയില്ല” എന്ന് ട്രമ്പ് ട്രൂത്ത് സോഷ്യലിൽ കുറിച്ചു.
നാറ്റോ സഖ്യത്തിൽ അംഗമാകുക എന്ന യുക്രെയ്ന്റെ മോഹമാണ് റഷ്യയുമായുള്ള യുദ്ധത്തിന്റെ പ്രഥമ കാരണമായി കണക്കാക്കുന്നത്. എന്നാൽ നിലവിൽ സമാധാനക്കരാറിനായി ആ ആഗ്രഹം ഉപേക്ഷിക്കേണ്ടി വരുമെന്ന സൂചനയാണ് ഇപ്പോൾ ട്രമ്പ് നൽകുന്നത്.
