ഇറാന്റെ 14 ഇന സമാധാന നിർദ്ദേശങ്ങൾ അംഗീകരിക്കാനാകില്ലെന്ന് ട്രമ്പ് !യുദ്ധം പുനരാരംഭിക്കുമെന്ന് മുന്നറിയിപ്പ്; സമാധാന നീക്കങ്ങൾക്ക് വീണ്ടും മങ്ങൽ

കാലിഫോർണിയ : ഇറാൻ സമർപ്പിച്ച പുതിയ 14 ഇന സമാധാന നിർദ്ദേശങ്ങളിൽ കടുത്ത അതൃപ്തി പ്രകടിപ്പിച്ച് അമേരിക്കൻ പ്രസിഡന്റ് ഡൊണാൾഡ് ട്രമ്പ് രംഗത്തെത്തി. കഴിഞ്ഞ 47 വർഷമായി ലോകത്തോടും മനുഷ്യത്വത്തോടും ഇറാൻ ചെയ്ത ക്രൂരതകൾക്ക് അർഹമായ വില അവർ ഇതുവരെ നൽകിയിട്ടില്ലെന്നും അതിനാൽ ഈ സമാധാന കരാർ അംഗീകരിക്കാൻ കഴിയില്ലെന്നുമാണ് ട്രമ്പിന്റെ നിലപാട്. ഫ്ലോറിഡയിൽ മാദ്ധ്യമങ്ങളോട് സംസാരിക്കവെ, ഇറാൻ ഇനിയും മോശമായി പെരുമാറിയാൽ നിർത്തിവെച്ചിരിക്കുന്ന സൈനിക ആക്രമണങ്ങൾ പുനരാരംഭിക്കാനുള്ള സാധ്യത തള്ളിക്കളയാനാവില്ലെന്ന് ട്രമ്പ് വ്യക്തമാക്കി.

അമേരിക്കയും ഇസ്രായേലും സംയുക്തമായി ഫെബ്രുവരിയിൽ ആരംഭിച്ച സൈനിക നീക്കം ഏപ്രിൽ 8 മുതൽ താൽക്കാലികമായി നിർത്തിവെച്ചിരിക്കുകയായിരുന്നു. പാകിസ്ഥാൻ മധ്യസ്ഥത വഹിക്കുന്ന ചർച്ചകളുടെ ഭാഗമായാണ് ഇറാൻ പുതിയ നിർദ്ദേശങ്ങൾ മുന്നോട്ട് വെച്ചത്. എന്നാൽ ഈ നിർദ്ദേശങ്ങളിൽ താൻ തൃപ്തനല്ലെന്നും ഇറാനെ പൂർണ്ണമായി തകർക്കുന്നതിനേക്കാൾ മനുഷ്യത്വപരമായ ഒരു കരാറിലെത്താനാണ് താൻ ആഗ്രഹിക്കുന്നതെന്നും ട്രമ്പ് കൂട്ടിച്ചേർത്തു. അതേസമയം, അമേരിക്കയുടെ ഏത് നീക്കത്തെയും നേരിടാൻ ഇറാൻ സായുധ സേന സജ്ജമാണെന്നും നയതന്ത്രത്തിന്റെ പാത വേണോ സംഘർഷം വേണോ എന്ന് തീരുമാനിക്കേണ്ടത് അമേരിക്കയാണെന്നും ഇറാൻ ഭരണകൂടം പ്രതികരിച്ചു.