ഇറാനോട് വിട്ടുവീഴ്ചയില്ലെന്ന് ട്രമ്പ് ; ടെഹ്‌റാൻറെ മിസൈൽ ആക്രമണത്തിന് കനത്ത തിരിച്ചടി നൽകുമെന്ന് മുന്നറിയിപ്പ്

വാഷിംഗ്ടൺ: അമേരിക്കൻ സൈനിക താവളങ്ങൾ ലക്ഷ്യമിട്ട് ഇറാന്റെ ഭാഗത്തുനിന്നുണ്ടായ മിസൈൽ ആക്രമണത്തിന് കനത്ത തിരിച്ചടി നൽകുമെന്ന് യുഎസ് പ്രസിഡന്റ് ഡൊണാൾഡ് ട്രമ്പ്. മേഖലയിലെ സംഘർഷങ്ങൾ വീണ്ടും പുകയുന്നതിനിടെയാണ് ഇറാന് കടുത്ത മുന്നറിയിപ്പുമായി അമേരിക്കൻ പ്രസിഡന്റ് രംഗത്തെത്തിയത്. ടെഹ്‌റാനെതിരെ ശക്തമായ സൈനിക നടപടികൾ ഉണ്ടാകുമെന്നും തങ്ങളുടെ സൈന്യത്തെ ആക്രമിക്കാൻ മുതിർന്നവർ കനത്ത വില നൽകേണ്ടിവരുമെന്നും അമേരിക്കൻ മാദ്ധ്യമത്തിന് നൽകിയ അഭിമുഖത്തിൽ ട്രമ്പ് വ്യക്തമാക്കി.

ജോർദാനിലെ യുഎസ് താവളങ്ങൾക്ക് നേരെ ഇറാൻ വിക്ഷേപിച്ച അഞ്ച് മിസൈലുകൾ വ്യോമപ്രതിരോധ സംവിധാനം ഉപയോഗിച്ച് വിജയകരമായി തകർത്തതായി അമേരിക്കൻ സേന സ്ഥിരീകരിച്ചിട്ടുണ്ട്. അതേസമയം ഇറാന്റെ പിന്തുണയോടെ ഇറാഖിൽ പ്രവർത്തിക്കുന്ന ഷിയ സായുധ സംഘങ്ങൾക്ക് നേരെ സൗദി അറേബ്യയുമായി ചേർന്ന് അമേരിക്ക സംയുക്ത വ്യോമാക്രമണം നടത്തി. ഈ തിരിച്ചടി ഇറാഖ് സർക്കാരുമായി ആലോചിച്ചാണ് നടപ്പിലാക്കിയതെന്ന് വ്യക്തമാക്കിയ ട്രമ്പ്, ഇത്തരം സായുധ സംഘങ്ങളെ ലോകത്തിലെ ‘കാൻസർ’ എന്നാണ് വിശേഷിപ്പിച്ചത്.

കഴിഞ്ഞ കുറച്ചു ദിവസങ്ങളായി സൗദിയിലെ എണ്ണ ശുദ്ധീകരണ ശാലകൾക്ക് നേരെ നടന്ന ഡ്രോൺ ആക്രമണങ്ങൾക്ക് മറുപടിയായാണ് ഇറാഖിലെ ഇറാൻ അനുകൂല സേനയായ ഹാഷെദ് അൽ-ഷാബി താവളങ്ങൾക്ക് നേരെ യുഎസ്-സൗദി സഖ്യം ബോംബാക്രമണം നടത്തിയത്. ഈ ആക്രമണത്തിൽ 20-ഓളം അംഗങ്ങൾ കൊല്ലപ്പെട്ടതായി ഇറാഖി സംഘടനകൾ സ്ഥിരീകരിച്ചു. ഇതിനിടെ ഹോർമൂസ് കടലിടുക്കിലൂടെയുള്ള എണ്ണക്കപ്പൽ ഗതാഗതം നിരോധിക്കാനും വഴിതിരിച്ചുവിടാനും ഇറാൻ ശ്രമിക്കുന്നത് അന്താരാഷ്ട്ര തലത്തിൽ പുതിയ ആശങ്കകൾക്ക് വഴിവെച്ചിട്ടുണ്ട്. പശ്ചിമേഷ്യയിൽ വീണ്ടും യുദ്ധഭീതി ഉയർന്നതോടെ ആഗോള വിപണിയിൽ അസംസ്കൃത എണ്ണവിലയിൽ അഞ്ച് ശതമാനത്തോളം വർദ്ധനവാണ് രേഖപ്പെടുത്തിയത്.