തൃപ്തി ദേശായി തിരികെ മടങ്ങുന്നു; വീണ്ടും വരുമെന്ന് ഭീഷണി

കൊച്ചി: ശബരിമല ദര്‍ശനത്തിനെത്തിയ ആക്റ്റിവിസ്റ്റ് തൃപ്തി ദേശായിയും സംഘവും മുംബൈയിലേക്ക് മടങ്ങി. ഇപ്പോൾ മടങ്ങുന്നുവെന്നും ശബരിമല ദർശനത്തിനായി വീണ്ടും വരുമെന്നും തൃപ്തി പറഞ്ഞു. ദർശനത്തിനു ശ്രമിച്ചാൽ ആക്രമണമുണ്ടാകുമെന്നു പൊലീസ് അറിയിച്ചതായും മറ്റു മാർഗങ്ങളില്ലാതെ മടങ്ങുന്നുവെന്നും തൃപ്തി പറഞ്ഞു.

ചൊവ്വാഴ്ച രാവിലെ ഏഴ് മണിയോടെയാണ് ശബരിമല ദര്‍ശനത്തിന് തൃപ്തിയും സംഘവും കൊച്ചിയില്‍ എത്തുന്നത്. എന്നാല്‍ പോലീസ് തൃപ്തിക്ക്സംരക്ഷണം നല്‍കാനാകില്ല എന്ന നിലപാട് സ്വീകരിക്കുകയായിരുന്നു. രാത്രി 12.20നുള്ള വിമാനത്തില്‍ മടങ്ങുമെന്ന് അറിയച്ചതിനെ തുടർന്ന് കൊച്ചി പൊലീസ് കമ്മിഷണര്‍ ഓഫീസിന് മുന്നിലെ പ്രതിഷേധം അവസാനിപ്പിച്ചിരുന്നു. എന്നാൽ വൈകിട്ടോടെ ശബരിമലയിൽ സന്ദർശനം നടത്തിയേ മടങ്ങൂ എന്ന നിലപാട് സ്വീകരിക്കുകയായിരുന്നു. പിന്നീട് പൊലീസുമായി നടത്തി അവസാനവട്ട ചർച്ചയിലാണ് മടങ്ങിപോകാൻ തീരുമാനിച്ചത്.