തമിഴ്‌നാട്ടിൽ ‘വിസിൽ’ മുഴക്കി ടിവികെ; പെരമ്പൂരിലും തിരുച്ചി ഈസ്റ്റിലും വിജയ് നേരിട്ട് ജനവിധി തേടും

തമിഴ്‌നാട് നിയമസഭാ തെരഞ്ഞെടുപ്പിനുള്ള സ്ഥാനാർത്ഥി പട്ടിക പുറത്തുവിട്ട് വിജയ് നയിക്കുന്ന തമിഴക വെട്രി കഴകം (ടിവികെ ). തെരഞ്ഞെടുപ്പിൽ ചെന്നൈയിലെ പെരമ്പൂർ, തിരുച്ചി ഈസ്റ്റ് എന്നീ രണ്ട് മണ്ഡലങ്ങളിൽ നിന്നാണ് വിജയ് മത്സരിക്കുന്നത്. തന്റെ പാർട്ടിയുടെ കന്നി പോരാട്ടത്തിൽ ജനങ്ങൾ തനിക്ക് ഒരു അവസരം നൽകണമെന്നും ഇതൊരു ‘വിസിൽ വിപ്ലവം’ ആണെന്നും സ്ഥാനാർത്ഥികളെ പ്രഖ്യാപിച്ചുകൊണ്ട് വിജയ് പറഞ്ഞു. സ്ഥാനാർത്ഥികൾക്കിടയിൽ താനെന്നോ മറ്റുള്ളവരെന്നോ വ്യത്യാസമില്ലെന്നും എല്ലാവരും ഒരേ ലക്ഷ്യത്തിനായി നിലകൊള്ളുന്നവരാണെന്നും വിജയ് കൂട്ടിച്ചേർത്തു. ഏപ്രിൽ 23-ന് ഒറ്റഘട്ടമായി നടക്കുന്ന തെരഞ്ഞെടുപ്പിൽ തമിഴ്‌നാട്ടിലെ 234 മണ്ഡലങ്ങളും പോളിംഗ് ബൂത്തിലേക്ക് നീങ്ങും.

നിലവിൽ ഡിഎംകെ പ്രതിനിധികൾ കൈവശം വച്ചിരിക്കുന്ന സീറ്റുകളിലാണ് വിജയ് പരീക്ഷണത്തിന് ഇറങ്ങുന്നത്. സാധാരണ പശ്ചാത്തലമുള്ള വ്യക്തികളെയാണ് ടിവികെ സ്ഥാനാർത്ഥികളായി അണിനിരത്തിയിരിക്കുന്നത്. അഴിമതിയും ഖനന മാഫിയയുമായി ബന്ധമില്ലാത്തവരും ജനങ്ങളുടെ കാവൽക്കാരായി പ്രവർത്തിക്കുന്നവരുമാണ് തന്റെ സ്ഥാനാർത്ഥികളെന്ന് വിജയ് അവകാശപ്പെട്ടു. ഭരണകക്ഷിയായ ഡിഎംകെയ്‌ക്കെതിരെ രൂക്ഷമായ വിമർശനമാണ് അദ്ദേഹം ഉന്നയിച്ചത്. അഴിമതിക്കേസിൽ ജയിലിൽ പോയി വന്നവർ പോലും ഡിഎംകെ സ്ഥാനാർത്ഥി പട്ടികയിലുണ്ടെന്ന് അദ്ദേഹം ആരോപിച്ചു. സ്റ്റാലിന്റെ നേതൃത്വത്തിലുള്ള സഖ്യവും തന്റെ ജനകീയ സഖ്യവും തമ്മിലാണ് പ്രധാന പോരാട്ടമെന്നും വിജയ് പ്രഖ്യാപിച്ചു.

മുഖ്യമന്ത്രി എം.കെ. സ്റ്റാലിനെതിരെ കൊളത്തൂർ മണ്ഡലത്തിൽ ടിവികെയിലെ വി.എസ്. ബാബുവാണ് മത്സരിക്കുന്നത്. ഉപമുഖ്യമന്ത്രി ഉദയനിധി സ്റ്റാലിനെതിരെ ചെപ്പോക്കിൽ മുൻ കോൺഗ്രസ് നേതാവ് സെൽവത്തെയാണ് വിജയ് അണിനിരത്തിയിരിക്കുന്നത്. ലഹരിമുക്ത തമിഴ്‌നാട്, തൊഴിൽ രഹിതർക്ക് പ്രതിമാസ ധനസഹായം, സർക്കാർ ജോലി നിയമനങ്ങളിൽ സുതാര്യത ഉറപ്പാക്കാൻ പുതിയ നിയമം എന്നിവയാണ് വിജയ് വോട്ടർമാർക്ക് നൽകുന്ന പ്രധാന വാഗ്ദാനങ്ങൾ. ഡിഎംകെ, എഐഎഡിഎംകെ-ബിജെപി സഖ്യം, പിഎംകെ-ശശികല സഖ്യം എന്നിവർക്കൊപ്പം വിജയ്‌യുടെ പാർട്ടിയും കൂടി എത്തിയതോടെ തമിഴ്‌നാട്ടിൽ ശക്തമായ ചതുഷ്കോണ മത്സരത്തിനാണ് കളമൊരുങ്ങിയിരിക്കുന്നത്.