ജമ്മു കശ്മീരിൽ ഭീകരവേട്ട തുടരുന്നു; ഒരു ഭീകരനെ കൂടി വധിച്ചു; കൂടുതൽ പേർക്കായി തിരച്ചിൽ ഊർജ്ജിതമാക്കി സുരക്ഷാ സേന

ശ്രീനഗർ: ജമ്മു കശ്മീരിൽ ഭീകരവേട്ട തുടർന്ന് സുരക്ഷാ സേന (Terrorists Killed In Jammu Kashmir). ജമ്മുകശ്മീരിൽ അനന്തനാഗിലും ബന്ദിപോറയിലുമായി രണ്ടു ഭീകരരെ സുരക്ഷാ സേന വധിച്ചു. ഡി.ജി.പി ദിൽബാഗ് സിംഗ് ആണ് ഇതുസംബന്ധിച്ച വിവരങ്ങൾ മാധ്യമങ്ങളോട് വ്യക്തമാക്കിയത്.

അനന്തനാഗിലും ബന്ദിപ്പോറയിലും രണ്ട് വ്യത്യസ്ത റെയ്ഡുകളാണ് നടന്നതെന്നും ഇരുവരും സമീപകാലത്ത് സാധാരണക്കാരെ കൊലപ്പെടുത്തിയ സംഭവങ്ങളുമായി ബന്ധപ്പെട്ടവരാണെന്നും ഡി.ജി.പി പറഞ്ഞു.
അനന്തനാഗിൽ ഇംതിയാസ് അഹമ്മദ് ദാറിനേയും ബന്ദിപ്പോറയിൽ മുഹമ്മദ് ഷാഫി ലോണിനേയുമാണ് സൈന്യം വധിച്ചത്. ഇംതിയാസ് അഹമ്മദ് ദാറിനെ ഇന്ന് പുലർച്ചെയോടെയാണ് സേന പിടികൂടി വധിച്ചത്.

അതേസമയം പ്രദേശവാസികളുടെ സഹായത്താലാണ് ബന്ദിപ്പോറയിൽ വധിക്കപ്പെട്ടത് മുഹമ്മദ് ഷാഫിയാണെന്ന് തിരിച്ചറിഞ്ഞത്. നയിദ്ഖായി പ്രദേശവാസി കൂടിയാണ് കൊല്ലപ്പെട്ട മുഹമ്മദ് ഷാഫി. ഒരു മാസത്തിനിടെ നാല് സംഭവങ്ങളിലായി അഞ്ചു സാധാരണക്കാരണ് ഭീകരരുടെ ആക്രമണത്തിൽ കൊല്ലപ്പെട്ടത്. താഴ്വരയിലെ സമാധാന അന്തരീക്ഷം തകർക്കാനുള്ള ഭീകരരുടെ എല്ലാ നീക്കങ്ങളും സൈന്യം തകർത്തുകൊണ്ടിരിക്കുകയാണ്. സാധാരണക്കാരന്റെ ജീവന് സുരക്ഷ ഉറപ്പാക്കുമെന്നും ഡി.ജി.പി ദിൽബാഗ് സിംഗ് പറഞ്ഞു. പ്രദേശത്ത് വീണ്ടും കൂടുതൽ ഭീകരർക്കായി തിരച്ചിൽ തുടരുകയാണ്.