യുഡിഎഫ് മന്ത്രിസഭാ രൂപീകരണം അന്തിമഘട്ടത്തിൽ; ഘടകകക്ഷികളുമായി ഇന്ന് ഉഭയകക്ഷിചർച്ച ; തിങ്കളാഴ്ച സത്യപ്രതിജ്ഞ, ഭിന്നതകൾക്കൊടുവിൽ അനുനയം

തിരുവനന്തപുരം: സംസ്ഥാനത്ത് സർക്കാർ അധികാരമേൽക്കാനുള്ള നടപടികൾ വേഗത്തിലാക്കി യുഡിഎഫ് സർക്കാർ . ഘടകകക്ഷികളുമായുള്ള മന്ത്രിസ്ഥാനം, വകുപ്പ് വിഭജനം എന്നിവയിൽ അന്തിമ ധാരണയിലെത്തുന്നതിനായുള്ള ഔദ്യോഗിക ഉഭയകക്ഷി ചർച്ചകൾ ഇന്ന് നടക്കും. തിങ്കളാഴ്ച രാവിലെ 10 മണിക്ക് തിരുവനന്തപുരം സെൻട്രൽ സ്റ്റേഡിയത്തിലാണ് പുതിയ മന്ത്രിസഭയുടെ സത്യപ്രതിജ്ഞ ചടങ്ങ് നിശ്ചയിച്ചിരിക്കുന്നത്.

തുടക്കത്തിൽത്തന്നെ മുന്നണിയിൽ ഉടലെടുത്ത ആഭ്യന്തര ഭിന്നതകൾ പരിഹരിക്കാനുള്ള ഊർജിത നീക്കങ്ങളാണ് കഴിഞ്ഞ മണിക്കൂറുകളിൽ തലസ്ഥാനത്ത് നടന്നത്. മുഖ്യമന്ത്രി സ്ഥാനത്തേക്ക് പരിഗണിക്കപ്പെട്ടിരുന്ന മുതിർന്ന നേതാവ് രമേശ് ചെന്നിത്തല മാറിനിൽക്കുമെന്ന സൂചനകൾ ആദ്യഘട്ടത്തിൽ കല്ലുകടിയായെങ്കിലും, നിയുക്ത മുഖ്യമന്ത്രി വി.ഡി. സതീശനും ഹൈക്കമാൻഡ് പ്രതിനിധി ദീപാ ദാസ്‌മുൻഷിയും നേരിട്ടെത്തി നടത്തിയ ചർച്ചകൾക്കൊടുവിൽ അനുനയത്തിന്റെ വഴി തുറന്നു. സുപ്രധാനമായ ആഭ്യന്തരവകുപ്പ് ലഭിച്ചാൽ മന്ത്രിസഭയുടെ ഭാഗമാകാമെന്ന നിലപാടിലേക്ക് രമേശ് ചെന്നിത്തല എത്തിയതായാണ് സൂചന.
മുന്നണിയിലെ പ്രധാന ഘടകകക്ഷിയായ മുസ്‌ലിംലീഗ് അഞ്ച് മന്ത്രിസ്ഥാനങ്ങൾക്ക് അവകാശവാദമുന്നയിച്ചിട്ടുണ്ടെങ്കിലും, നാല് മന്ത്രിസ്ഥാനങ്ങളും കാബിനറ്റ് റാങ്കുള്ള മറ്റൊരു പദവിയും നൽകി ഒത്തുതീർപ്പിലെത്താനാണ് നിലവിലെ ആലോചന. കോൺഗ്രസിന് മുഖ്യമന്ത്രിയടക്കം 12 മന്ത്രിസ്ഥാനങ്ങളും സ്പീക്കർ പദവിയും ലഭിച്ചേക്കും. മറ്റ് ഘടകകക്ഷികൾക്ക് ഒരോ മന്ത്രിസ്ഥാനം വീതവും സഭയിലെ അംഗബലം അനുസരിച്ച് മറ്റ് പദവികളും നൽകാനാണ് യു.ഡി.എഫ്. നേതൃത്വം ഉദ്ദേശിക്കുന്നത്. കഴിഞ്ഞ ദിവസം ചേർന്ന യു.ഡി.എഫ്. ഉന്നതാധികാരസമിതി യോഗത്തിൽ, ആദ്യ മന്ത്രിസഭായോഗത്തിൽ പരിഗണിക്കേണ്ട അടിയന്തര വിഷയങ്ങളെക്കുറിച്ചുള്ള നിർദേശങ്ങൾ സമർപ്പിക്കാൻ കക്ഷികളോട് ആവശ്യപ്പെട്ടിട്ടുണ്ട്.