പുതുപ്പള്ളിയിൽ യുഡിഎഫ് സ്ഥാനാർത്ഥി മണിക്കൂറുകൾക്കുള്ളിൽ!പ്രഖ്യാപനമുടനെന്ന് പ്രതിപക്ഷ നേതാവ് വി.ഡി. സതീശൻ

തിരുവനന്തപുരം : മുൻ മുഖ്യമന്ത്രി ഉമ്മൻ ചാണ്ടിയുടെ നിര്യാണത്തെ തുടർന്ന് ഒഴിവ് വന്ന പുതുപ്പള്ളി നിയമസഭാ മണ്ഡലത്തിലേക്കുള്ള ഉപതെരഞ്ഞെടുപ്പ് സെപ്റ്റംബർ 5ന് നടക്കുമെന്ന് ദേശീയ തെരഞ്ഞെടുപ്പ് കമ്മിഷൻ അറിയിച്ച സാഹചര്യത്തിൽ ഉപതിരഞ്ഞെടുപ്പിൽ യുഡിഎഫ് സ്ഥാനാർത്ഥിയെ മണിക്കൂറുകൾക്കുള്ളിൽ പ്രഖ്യാപിക്കുമെന്ന് പ്രതിപക്ഷ നേതാവ് വി.ഡി. സതീശൻ വ്യക്തമാക്കി.

‘‘കോൺഗ്രസ് വലിയ ഭൂരിപക്ഷത്തിൽ ജയിക്കും. തെരഞ്ഞെടുപ്പിന്റെ എല്ലാ ഒരുക്കങ്ങളും ആരംഭിച്ചിട്ടുണ്ട്. ഇനി യുദ്ധകാലാടിസ്ഥാനത്തിൽ മുന്നോട്ടുപോകും. 2021ൽ ഉമ്മൻ ചാണ്ടി നേടിയ ഭൂരിപക്ഷത്തേക്കാൾ ഉയർന്ന രീതിയിൽ ഇത്തവണ നേടും. ഉമ്മൻ ചാണ്ടിയുടെ ഓർമകൾ ജനങ്ങളുടെ മനസ്സിലുണ്ട്. പുതുപ്പള്ളിയിലെ ജനങ്ങളുടെ മനസ്സിന്റെ കോടതിയിൽ ഈ സർക്കാരിനെ വിചാരണ ചെയ്യുന്ന ദിവസങ്ങളാണ് ഇനിയുള്ളത്. ഈ സർക്കാരിനെ ജനങ്ങളുടെ മുന്നിൽ ഒന്നുകൂടി തുറന്നുകാട്ടാനുള്ള അവസരമാക്കി ഈ തിരഞ്ഞെടുപ്പിനെ മാറ്റും.

വിജയിക്കാൻവേണ്ടി മാത്രമുള്ള തെരഞ്ഞെടുപ്പല്ല ഞങ്ങൾക്കിത്. ഈ സർക്കാരിനെയും കേന്ദ്ര സർക്കാരിനെയും ജനങ്ങളുടെ മുൻപിൽ വിചാരണ ചെയ്യാനുള്ള അവസരം കൂടിയാണ്. ആശയപരമായും രാഷ്ട്രീയമായും ഈ തെരഞ്ഞെടുപ്പിനെ നേരിടും. പൂർണമായ ആത്മവിശ്വാസമുണ്ട്. തൃക്കാക്കര ഉപതെരഞ്ഞെടുപ്പിൽ ചെയ്തതുപോലെ യുഡിഎഫിന്റെ മുഴുവൻ നേതാക്കളും ഒരു ടീമായി പ്രവർത്തിച്ച് വിജയം നേടും’’ – വി.ഡി. സതീശൻ വ്യക്തമാക്കി.