ഇന്ത്യൻ സമ്പദ് വ്യവസ്ഥക്ക് ലോകത്തിന്റെ കയ്യടി ! ഇന്ന് കേന്ദ്ര ബജറ്റ്; ആത്മവിശ്വാസത്തോടെ രാജ്യം; പ്രതീക്ഷകളോടെ കേരളവും

ദില്ലി: ആഗോള സമ്പദ് വ്യവസ്ഥ ഇടിയുമ്പോഴും ഇന്ത്യൻ സമ്പദ് വ്യവസ്ഥ ലോകത്തിൽ ഏറ്റവും വേഗത്തിൽ വളരുന്ന സമ്പദ് വ്യവസ്ഥയായി തുടരുമെന്ന ഐ എം എഫ് അടക്കമുള്ള അന്താരാഷ്‌ട്ര ഏജൻസികളുടെ പ്രവചനങ്ങൾക്കിടെ കേന്ദ്ര ബജറ്റ് ഇന്ന്. കേന്ദ്ര ധനമന്ത്രി നിർമ്മലാ സീതാരാമൻ ഇന്ന് 11:30 ന് പാർലമെന്റിൽ 2023-24 സാമ്പത്തിക വർഷത്തേക്കുള്ള ബജറ്റ് അവതരിപ്പിക്കും. ഇന്നലെയാണ് പാർലമെന്റിന്റെ ബജറ്റ് സമ്മേളനം രാഷ്ട്രപതിയുടെ നയപ്രഖ്യാപനത്തോടെ ആരംഭിച്ചത്. സാമ്പത്തിക സർവേയും ഇന്നലെ പാർലമെന്റിൽ അവതരിപ്പിച്ചിരുന്നു. നടപ്പ് സാമ്പത്തിക വർഷം ഇന്ത്യയുടെ സാമ്പത്തിക വളർച്ച 7 ശതമായിരിക്കുമെന്നും അടുത്തവർഷം 6.8 ശതമായിരിക്കുമെന്നും സാമ്പത്തിക സർവ്വേയിൽ ചൂണ്ടിക്കാട്ടുന്നു.

അതേസമയം കോവിഡ് കാലത്തിനു ശേഷം ലോകത്തിലെ പ്രമുഖ സമ്പദ് വ്യവസ്ഥകൾ പൂർവ്വസ്ഥിതിയിലായിട്ടില്ലെന്നും ഇന്ത്യ ഇതിനൊരു അപവാദമാണെന്നും ഐ എം എഫ് കണക്കുകൾ സൂചിപ്പിക്കുന്നു. ഇന്ത്യ നടപ്പ് സാമ്പത്തിക വർഷം 6.1% വളരുമെന്നാണ് ഐ എം എഫ് പ്രവചനം. അമേരിക്ക 1.4%, ജർമ്മനി 0.1% ഫ്രാൻസ് 0.7% യൂ കെ 0.6% ചൈന 5.2% എന്നിങ്ങനെയാണ് ഐ എം എഫ് കണക്കുകൾ പ്രകാരം വിവിധ രാജ്യങ്ങളുടെ വളർച്ചാ നിരക്ക്.

രാജ്യത്തിന്റെ ത്വരിത വികസനം സാധ്യമാക്കുന്ന ജനകീയ ബജറ്റാകും അവതരിപ്പിക്കപ്പെടുകയെന്ന് പ്രധാനമന്ത്രി നരേന്ദ്രമോദി ഇന്നലെ മാധ്യമങ്ങളോട്‌ പറഞ്ഞിരുന്നു. ഖജനാവ് കാലിയായതോടെ കേരളവും വലിയ പ്രതീക്ഷയോടെയാണ് കേന്ദ്ര ബജറ്റിനെ നോക്കിക്കാണുന്നത്. സിൽവർ ലൈൻ പദ്ധതിക്ക് അനുമതി വേണമെന്നും കടമെടുപ്പ് പരിധി വർദ്ധിപ്പിക്കണമെന്നും ജി എസ ടി വിഹിതം അറുപത് ശതമാക്കണമെന്നും ജി എസ് ടി നഷ്‌ടപരിഹാരം അഞ്ചു വർഷത്തേക്ക് കൂടി നീട്ടണമെന്നും, കിഫ്‌ബി ഉൾപ്പെടെയുള്ള ഏജൻസികൾ എടുത്ത വായ്‌പകൾ സർക്കാരിന്റെ വായ്പ്പയായി കണക്കാക്കി പരിധി വെട്ടിക്കുറച്ചത് പിൻവലിക്കണമെന്നും സംസ്ഥാനം ബജറ്റിന്റെ പശ്ചാത്തലത്തിൽ കേന്ദ്രത്തോട് ആവശ്യപ്പെട്ടിട്ടുണ്ട്. ധൂർത്തും കടമെടുപ്പും കുറച്ച് വരുമാന വർദ്ധനവ് ഉറപ്പുവരുത്തനുള്ള ശ്രമങ്ങൾ സംസ്ഥാന സർക്കാർ നടപ്പിലാക്കണമെന്നാണ് കേന്ദ്ര നിലപാട്. എങ്കിലും കേരളത്തിന്റെ അടിസ്ഥാന സൗകര്യ വികസനത്തിന് ഉതകുന്ന പദ്ധതികൾ ബജറ്റിലുണ്ടാകുമെന്നാണ് പ്രതീക്ഷ.