എല്ലാ സർവ്വകലാശാലകളും ഭഗവാൻ ബിർസ മുണ്ട ജന്മദിന ആഘോഷങ്ങൾ സംഘടിപ്പിക്കണം; ആഘോഷ പരിപാടികൾ നവംബർ 15 മുതൽ 26 വരെ; വൈസ് ചാൻസിലർമാർക്ക് യു ജി സി യുടെ നിർദ്ദേശം

ദില്ലി: സ്വാതന്ത്ര്യസമര സേനാനിയും ഗോത്രവർഗ്ഗ നേതാവുമായിരുന്ന ഭഗവാൻ ബിർസ മുണ്ടയുടെ ജന്മദിനം രാജ്യത്തെ എല്ലാ ഉന്നത വിദ്യാഭ്യാസ സ്ഥാപനങ്ങളും വിവിധ പരിപാടികളോടെ ആഘോഷിക്കണമെന്ന് നിർദ്ദേശം നൽകി യു ജി സി. നവമ്പർ 15 മുതൽ ഭരണഘടനാ ദിനമായ 26 വരെയാണ് ആഘോഷ പരിപാടികൾ സംഘടിപ്പിക്കേണ്ടത്. 2020 മുതൽ കേന്ദ്ര സർക്കാർ ബിർസ മുണ്ടയുടെ ജന്മദിനം ജൻ ജാതീയ ഗൗരവ് ദിവസ് ആയിട്ടാണ് ആഘോഷിക്കുന്നത്. കേന്ദ്ര പട്ടികവർഗ്ഗ ക്ഷേമ വകുപ്പിന്റെ നേതൃത്വത്തിലാണ് ജൻ ജാതീയ ഗൗരവ് ദിവസ് ആഘോഷിക്കുന്നത്.

നാലാമത് ജൻ ജാതീയ ഗൗരവ് ദിവസ് ഈ മാസം 15 മുതൽ ഭരണഘടനാ ദിനമായ 26 വരെ ആഘോഷിക്കാൻ തീരുമാനിച്ചിട്ടുണ്ടെന്നും ഇതനുസരിച്ച് രാജ്യത്തെ എല്ലാ ഉന്നത വിദ്യാഭ്യാസ സ്ഥാപനങ്ങളും ആഘോഷ പരിപാടികൾ സംഘടിപ്പിക്കണമെന്നും ഈ മാസം 12 ന് പുറത്തിറങ്ങിയ സർക്കുലറിൽ പറയുന്നു. ബിർസ മുണ്ടയുടെ നൂറ്റി അൻപതാം ജന്മദിനം അടുത്ത വർഷം ആഘോഷിക്കുകയാണ്. അതുകൊണ്ട് തന്നെ 2024 നവംബർ 15 മുതൽ 2025 നവംബർ 25 വരെ ഒരു വർഷം നീണ്ടു നിൽക്കുന്ന പരിപാടികൾ കേന്ദ്ര സർക്കാർ ആസൂത്രണം ചെയ്തിട്ടുണ്ട്.

1875 നവംബർ 15 ന് ഇന്നത്തെ ജാർഖണ്ഡ് സംസ്ഥാനത്തെ റാഞ്ചി ജില്ലയിലെ ഉലിഹാതുവിലാണ് ബിർസ മുണ്ട ജനിച്ചത്. ഗോത്ര വർഗ്ഗ വിഭാഗങ്ങളുടെ ഭൂമി തട്ടിയെടുക്കുന്ന ഭൂപ്രമുഖന്മാർക്കും അവരെ പിന്തുണയ്ക്കുന്ന ബ്രിട്ടീഷ് ഭരണകൂടത്തിനുമെതിരെ സായുധ സമരം നടത്തിയ ധീര ദേശാഭിമാനിയായിരുന്നു അദ്ദേഹം. ‘രാജ്ഞിയുടെ രാജ്യം തകരട്ടെ നമ്മുടെ രാജ്യം സ്ഥാപിക്കപ്പെടട്ടെ’ എന്ന മുദ്രാവാക്യത്തോടെ അദ്ദേഹം ഗോത്രവർഗ്ഗ ജനതയെ സംഘടിപ്പിച്ച് ബ്രിട്ടീഷ് ഭരണകൂടത്തിനെതിരെ അദ്ദേഹം സമരം നടത്തി. 1900 ഫെബ്രുവരി 3 ന് അദ്ദേഹത്തെ ബ്രിട്ടീഷ് ഭരണകൂടം അറസ്റ്റ് ചെയ്‌ത്‌ ജയിലിലടച്ചു. കേസ് വിചാരണയ്ക്കിടെ അതേവർഷം ജൂൺ 9 ന് അദ്ദേഹം അന്തരിച്ചു. ഇതേ കേസിൽ ജയിലിൽ അടക്കപ്പെട്ട 9 പേരാണ് വിചാരണയ്ക്കിടെ മരിച്ചത്.