സർവ്വകാല റെക്കോർഡ് ഭേദിച്ച് യുപിഐ ഇടപാടുകൾ ; ഒക്ടോബറോടെ നടന്നത് 17 ലക്ഷം കോടിയുടെ ഇടപാടുകൾ

ദില്ലി : യുപിഐ ഇടപാടുകളിൽ റെക്കോർഡ് വർദ്ധനവ്. ഒക്ടോബർ വരെയുള്ള സാമ്പത്തിക വർഷത്തിൽ 17.16 ലക്ഷം കോടി രൂപയുടെ ഇടപാടുകൾ നടന്നതായാണ് പുറത്തുവരുന്ന റിപ്പോർട്ട്. ഇതുവരെയുമുള്ള സർവ്വകാല റെക്കോർഡ് ഭേദിക്കുന്നതാണ് ഇപ്പോൾ പുറത്തുവന്നിരിക്കുന്ന റിപ്പോർട്ട്.

15.8 ലക്ഷം കോടിയുടെ യുപിഐ ഇടപാടുകളായിരുന്നു സെപ്റ്റംബറിൽ നടന്നത്. ഇപ്പോൾ 9 ശതമാനത്തിന്റെ കുതിച്ചുചാട്ടമാണ് ഒക്ടോബർ മാസം രേഖപ്പെടുത്തിയിരിക്കുന്നത്. യുപിഐ വഴി സുഗമമായി പേയ്‌മെന്റുകൾ നടത്തുന്ന പ്രവണത വർദ്ധിക്കുന്നതിന്റെ തെളിവുകളാണ് ഇപ്പോൾ പുറത്തുവന്നിരിക്കുന്ന റിപ്പോർട്ട്. നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യയാണ് പുതിയ കണക്കുകൾ പുറത്തുവിട്ടിരിക്കുന്നത്. 55 ശതമാനമാണ് യുപിഐ ഇടപാടുകളിലെ വർദ്ധനവ്. മൂല്യത്തിന്റെ അടിസ്ഥാനത്തിൽ 42 ശതമാനം വളർച്ചയുമുണ്ടായിട്ടുണ്ടെന്നും എൻപിസിഐ പുറത്തുവിട്ട കണക്കുകൾ വ്യക്തമാക്കുന്നു.