“എസ്ഡിപിഐയുടെ അഴിഞ്ഞാട്ടത്തിന് സിപിഎം കുടപിടിക്കുന്നു”; പിണറായി സർക്കാരിനെതിരെ തുറന്നടിച്ച് വാനതി ശ്രീനിവാസൻ

തൃശ്ശൂർ: കൊലപാതകങ്ങൾ നടത്താൻ എസ്ഡിപിഐയെ സിപിഎം (CPM) പിന്തുണയ്ക്കുന്നുവെന്ന് മഹിളാ മോർച്ച ദേശീയ അദ്ധ്യക്ഷ വാനതി ശ്രീനിവാസൻ. ബിജെപി പ്രവർത്തകൻ ബിജുവിന്റെ വീട് സന്ദർശിച്ച ശേഷമായിരുന്നു വാനതിയുടെ പ്രതികരണം. കേസ് അന്വേഷണം എൻഐഎയെ ഏൽപ്പിക്കാൻ പിണറായി സർക്കാർ തയ്യാറാകണമെന്നും അവർ ആവശ്യപ്പെട്ടു.

അതേസമയം എസ്ഡിപിഐയുടെ അഴിഞ്ഞാട്ടത്തിന് സിപിഎം കുടപിടിക്കുന്നുവെന്നും, സംസ്ഥാന സർക്കാരിന് നീതിയുക്തമായ അന്വേഷണം ഉറപ്പാക്കാൻ ആവില്ലെന്നും അവർ തുറന്നടിച്ചു. അന്തർദേശീയ ബന്ധങ്ങൾ പോലും കൊലപാതകത്തിനു പിന്നിൽ ഉണ്ടാകാൻ സാധ്യതയുണ്ട് . എസ്ഡിപിഐ നടത്തുന്ന കൊലപാതകങ്ങൾക്ക് സംസ്ഥാന സർക്കാരിനെ നിയന്ത്രിക്കുന്ന സിപിഎം പിന്തുണ നൽകുന്നതായും വാനതി ശ്രീനിവാസൻ കുറ്റപ്പെടുത്തി.

എന്നാൽ ബിജുവിന്റെയും, സഞ്ജിത്തിന്റെയും കൊലപാതകങ്ങൾ എൻഐഎയ്‌ക്ക് വിടണമെന്ന ആവശ്യം ബിജെപി കേരള ഘടകവും ശക്തമാക്കിയിട്ടുണ്ട്. ഇതിനിടെയാണ് കേസുകൾ എൻഐഎയ്‌ക്ക് വിടാൻ സർക്കാർ തയ്യാറാകണമെന്ന് വാനതി ശ്രീനിവാസൻ ആവശ്യപ്പെട്ടിരിക്കുന്നത്.