വില്ലുപുരം വിഷമദ്യ ദുരന്തം; മരണം നാലായി

വില്ലുപുരം : തമിഴ്നാട് വില്ലുപുരത്ത് വിഷമദ്യത്തിൽ മരിച്ചവരുടെ എണ്ണം നാലായി ഉയർന്നു. നേരത്തെ മരിച്ച എക്യാർകുപ്പം സ്വദേശികളായ സുരേഷ്, ശങ്കർ, ധരണിധരൻ എന്നിവർക്ക് പുറമെ അസ്വസ്ഥത അനുഭവപ്പെട്ടിട്ടും ആശുപത്രിയിൽ പോകാൻ തയ്യാറാകാതിരുന്ന രാജമൂർത്തി എന്നയാളാണ് മരിച്ചത്. മദ്യപിച്ച ശേഷം കുഴഞ്ഞുവീണ നിരവധിയാളുകളെ മുണ്ടയംപാകം സർക്കാർ ആശുപത്രിയിൽ പ്രവേശിപ്പിച്ചിരുന്നു.

വീടുകളിൽ അബോധാവസ്ഥയിൽ കഴിഞ്ഞിരുന്ന ആളുകളെ പിന്നീട് പൊലീസാണ് ആശുപത്രിയിൽ പ്രവേശിപ്പിച്ചത്. നിലവിൽ ചികിത്സയിലുള്ള 16 പേരിൽ 8 പേരുടെ നില ഗുരുതരമാണ്. അതെ സമയം വിഷമദ്യമുണ്ടാക്കിയ അമരൻ എന്നയാളെ പൊലീസ് അറസ്റ്റ് ചെയ്തു. സംഭവത്തിൽ പൊലീസ് ഇൻസ്പെക്ടർ അരുൾ, അസിസ്റ്റന്റ് ഇൻസ്പെക്ടർ ദീപൻ, എക്സൈസ് ഇൻസ്പെക്ടർ മരിയ സോഫി എന്നിവരെ സസ്പെൻഡ് ചെയ്തിട്ടുണ്ട്. മരിച്ചവരുടെ കുടുംബത്തിന് മുഖ്യമന്ത്രി എം.കെ.സ്റ്റാലിൻ 10 ലക്ഷം രൂപ ധനസഹായം പ്രഖ്യാപിച്ചു.