കാനഡയിലെ എഡ്മണ്ടണിൽ ഹിന്ദു ക്ഷേത്രത്തിന് നേരെ അതിക്രമം. എഡ്മണ്ടണിലെ ശ്രീ നാരായൺ മന്ദിറിലെ ചുവരുകളാണ് അക്രമകാരികൾ സ്പ്രേ പെയിന്റ് ഉപയോഗിച്ച് വൃത്തികേടാക്കിയത്. അതിക്രമത്തിന് പിന്നിൽ ഖലിസ്ഥാൻ ഭീകരരെന്നാണ് സംശയിക്കുന്നത്.
സംഭവത്തെ കാനഡയിലെ വിശ്വഹിന്ദു പരിഷത്ത് ശക്തമായി അപലപിച്ചു. വളർന്നുവരുന്ന തീവ്രവാദ ആശയങ്ങൾക്കെതിരെ പ്രവർത്തിക്കാൻ കാനഡ സർക്കാരിനോട് സംഘടന ആവശ്യപ്പെടുകയും ചെയ്തു.
“എഡ്മണ്ടനിലെ ശ്രീ നാരായൺ മന്ദിറിലെ ഹിന്ദുഫോബിക് ഗ്രാഫിറ്റി & നശീകരണ പ്രവർത്തനങ്ങളെ വിശ്വഹിന്ദു പരിഷത്ത് കാനഡ ശക്തമായി അപലപിക്കുന്നു. കാനഡയിൽ സമാധാനം ഇഷ്ടപ്പെടുന്ന ഹിന്ദു സമൂഹത്തിനെതിരെ വിദ്വേഷം വളർത്തുന്ന തീവ്രവാദ പ്രത്യയശാസ്ത്രത്തിനെതിരെ നിർണ്ണായകമായി പ്രവർത്തിക്കാൻ കാനഡയിലെ എല്ലാ സംവിധാനങ്ങളോടും ഞങ്ങൾ അഭ്യർത്ഥിക്കുന്നു,” സംഘടന സമൂഹ മാദ്ധ്യമമായ എക്സിൽ കുറിച്ചു.
ഖാലിസ്ഥാനി വിഘടനവാദികൾ സമീപകാലത്ത് ഇത്തരത്തിൽ ചുവരെഴുത്തുകളാൽ ഒരു ക്ഷേത്രം വികൃതമാക്കുന്നത് ഇത് ആദ്യ സംഭവമല്ല.
ഖാലിസ്ഥാൻ ഭീകരൻ ഹർദീപ് സിംഗ് നിജ്ജാറിൻ്റെ മരണത്തിന് ശേഷം ഖാലിസ്ഥാൻ അനുകൂലികൾ കാനഡയിൽ ഇന്ത്യാ വിരുദ്ധ പ്രവർത്തനങ്ങൾ വർധിപ്പിച്ചിരിക്കുകയാണ്.
