ബ്രിക്സ് രാജ്യങ്ങളുടെ വികസനത്തിന് തടയിടുന്ന വിവേചനപരമായ ഉപരോധങ്ങളെ ഒറ്റക്കെട്ടായി ചെറുക്കും !ട്രമ്പിന്റെ ഭീഷണിക്ക് മറുപടിയുമായി വ്ളാഡിമിർ പുടിൻ

ബെയ്ജിങ്: ബ്രിക്സ് രാജ്യങ്ങൾക്ക് മേൽ അധിക തീരുവ ചുമത്തുമെന്ന ഡൊണാൾഡ് ട്രമ്പിന്റെ ഭീഷണിക്ക് റഷ്യൻ പ്രസിഡന്റ് വ്ളാഡിമിർ പുടിന്റെ മുന്നറിയിപ്പ്. ബ്രിക്സ് അംഗരാജ്യങ്ങളുടെ സാമൂഹിക-സാമ്പത്തിക വികസനത്തിന് തടസ്സമുണ്ടാക്കുന്ന വിവേചനപരമായ ഉപരോധങ്ങൾക്കെതിരെ ഒരുമിച്ച് നിലപാട് സ്വീകരിച്ചിട്ടുണ്ടെന്ന് പുടിൻ പറഞ്ഞു. ഇത്തരം നീക്കങ്ങളെ ഒറ്റക്കെട്ടായി ചെറുക്കുമെന്നും അദ്ദേഹം കൂട്ടിച്ചേർത്തു.

ഷാങ്ഹായ് സഹകരണ ഓർഗനൈസേഷന്റെ (എസ്.സി.ഒ.) ഉച്ചകോടിയിൽ പങ്കെടുക്കാൻ ചൈനയിലെ ടിയാൻജിനിൽ എത്തിയ പുടിൻ സിൻഹുവ വാർത്താ ഏജൻസിക്ക് നൽകിയ അഭിമുഖത്തിലാണ് ഇക്കാര്യങ്ങൾ വ്യക്തമാക്കിയത്. ബ്രിക്സ് രാജ്യങ്ങൾക്ക് 10 ശതമാനം അധിക തീരുവ ചുമത്തുമെന്ന അമേരിക്കൻ പ്രസിഡന്റ് ഡൊണാൾഡ് ട്രമ്പിന്റെ ഭീഷണിക്കു പിന്നാലെയാണ് പുടിന്റെ ഈ പ്രസ്താവന. ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക, സൗദി അറേബ്യ, ഇറാൻ, എത്യോപ്യ, ഈജിപ്ത്, യു.എ.ഇ. തുടങ്ങിയ രാജ്യങ്ങളാണ് നിലവിൽ ബ്രിക്സിൽ അംഗങ്ങളായുള്ളത്.

ആഗോളതലത്തിലുള്ള വെല്ലുവിളികളെ നേരിടാൻ ബ്രിക്സിനെ ശക്തിപ്പെടുത്തുന്നതിൽ റഷ്യയും ചൈനയും ഒരുമിച്ചു നിൽക്കുകയാണെന്നും അടിസ്ഥാന സൗകര്യ വികസന പദ്ധതികൾക്കായി കൂടുതൽ വിഭവങ്ങൾ കണ്ടെത്താൻ ഇരുരാജ്യങ്ങളും ശ്രദ്ധ കേന്ദ്രീകരിക്കുന്നുണ്ടെന്നും പുടിൻ ചൂണ്ടിക്കാട്ടി. ‘എല്ലാ മനുഷ്യർക്കും ഗുണകരമാവുന്ന പുരോഗതിയാണ് നാം ലക്ഷ്യമിടുന്നത്. ഈ വലിയ ലക്ഷ്യത്തിനായി റഷ്യയും ചൈനയും ഒരുമിച്ച് പ്രവർത്തിക്കുമെന്ന ആത്മവിശ്വാസം എനിക്കുണ്ട്’ – അദ്ദേഹം പറഞ്ഞു.

ടിയാൻജിൻ ഉച്ചകോടി എസ്.സി.ഒ.യെ കൂടുതൽ ശക്തിപ്പെടുത്തുമെന്നും അദ്ദേഹം പ്രതീക്ഷ പ്രകടിപ്പിച്ചു. ലളിതവും എന്നാൽ ശക്തവുമായ തത്വങ്ങളാണ് എസ്.സി.ഒ.യുടെ ആകർഷണം. തുല്യമായ സഹകരണത്തിനുള്ള തുറന്ന സമീപനം, മൂന്നാമതൊരു കക്ഷിയെ ലക്ഷ്യമിടാതിരിക്കുക, ഓരോ രാജ്യത്തിന്റെയും ദേശീയമായ സവിശേഷതകളോടുള്ള ബഹുമാനം എന്നിവയാണ് ഈ തത്വങ്ങൾ. ഈ മൂല്യങ്ങളെ അടിസ്ഥാനമാക്കി, അന്താരാഷ്ട്ര നിയമങ്ങളെ മാനിക്കുന്ന നീതിയുക്തമായ ഒരു ബഹുധ്രുവ ലോകക്രമം രൂപപ്പെടുത്തുന്നതിൽ എസ്.സി.ഒ.ക്ക് നിർണായക പങ്കുവഹിക്കാൻ സാധിക്കുമെന്നും പുടിൻ കൂട്ടിച്ചേർത്തു.