പ്രഭാസ്- ദീപിക പദുക്കോൺ സിനിമയിൽ അഭിനയിക്കണോ? 15 ന് കൊച്ചിയിൽ ഓഡിഷൻ; ഭാഷയോ പ്രായമോ പ്രശ്നമല്ല

സൂപ്പർതാരം പ്രഭാസും ബോളിവുഡ് സുന്ദരി ദീപിക പദുക്കോണും ഒന്നിക്കുന്ന പുതിയ ചിത്രത്തിന് സിനിമ പ്രേക്ഷകർ ഏറെ ആകാംക്ഷയാണ് നൽകുന്നത്. ഈ സൂപ്പർ താരങ്ങൾക്കൊപ്പം അഭിനയിക്കാൻ നിങ്ങൾക്ക് താൽപര്യം ഉണ്ടോ? ഇപ്പോൾ ചിത്രത്തിലേക്ക് അഭിനേതാക്കളെ തേടുകയാണ് അണിയറ പ്രവർത്തകർ. വിവിധ സംസ്ഥാനങ്ങളിൽ നടത്തുന്ന ഓഡിഷനിലൂടെയാണ് ചിത്രത്തിലേക്കുവേണ്ട അഭിനേതാക്കളെ തെരഞ്ഞെടുക്കുക. .

സിനിമയുടെ കാസ്റ്റിങ് കോൾ പുറത്തിറക്കിയിരിക്കുന്നത് നിർമാതാക്കളായ വൈജയന്തി മൂവീസാണ്. ഭാഷയോ പ്രായമോ പ്രശ്‌നമില്ലെന്നാണ് കാസ്റ്റിംഗ് കോളില്‍ അണിയറ പ്രവര്‍ത്തകര്‍ പറയുന്നത്. നിങ്ങൾ അഭിനേതാവോ, മോഡലോ, ആയോധന കലാ വിദഗ്ധരോ ആരുമായാലും ചിത്രത്തിൽ അഭിനയിക്കുന്നതിനായി അപേക്ഷിക്കാം. ഈ മാസം 15നാണ് കൊച്ചിയിൽ വച്ച് ഓഡിഷൻ നടക്കുക. കൂടാതെ ബാംഗ്ലൂര്‍, ചെന്നൈ, പുതുച്ചേരി എന്നിവിടങ്ങളിലും ഓഡീഷന്‍ നടക്കുന്നുണ്ട്.

‘മഹാനടി’ എന്ന ചിത്രത്തിന് ശേഷം നാഗ് അശ്വിന്‍ സംവിധാനം ചെയ്യുന്ന ചിത്രത്തിൽ അമിതാഭ് ബച്ചനും പ്രധാന വേഷത്തിലെത്തുന്നുണ്ട്. മാത്രമല്ല ബോളിവുഡ് സുന്ദരി ദീപികയുടെ തെന്നിന്ത്യൻ അരങ്ങേറ്റ ചിത്രവുമാണിത്. പുറത്തുവരുന്ന റിപ്പോര്‍ട്ടുകള്‍ പ്രകാരം സയന്‍സ് ഫിക്ഷന്‍ എന്റര്‍ടെയ്‌നറാകും ചിത്രം. സാങ്കൽപ്പിക മൂന്നാം ലോക മഹായുദ്ധത്തിന്റെ പശ്ചാത്തലത്തിൽ നടക്കുന്ന ഒരു സയൻസ് ഫിക്ഷൻ ത്രില്ലറാണ് ചിത്രമെന്നാണ് സൂചന. 2021 അവസാനം സിനിമയുടെ ചിത്രീകരണം തുടങ്ങും.