പശ്ചിമേഷ്യ യുദ്ധകെടുതിയിൽ; കുവൈത്തിൽ ഇറാൻ മിസൈലാക്രമണം,3 യുഎസ് സൈനികർ കൊല്ലപ്പെട്ടു

​ടെഹ്‌റാൻ: ഇറാന്റെ പരമോന്നത നേതാവ് അയത്തുള്ള അലി ഖമനൈയിയുടെ വിയോഗത്തിന് പിന്നാലെ പശ്ചിമേഷ്യയിൽ സംഘർഷം അതീവ ഗുരുതരമാകുന്നു. കുവൈത്തിലെ അമേരിക്കൻ സൈനിക താവളത്തിന് നേരെ ഇറാൻ നടത്തിയ മിസൈലാക്രമണത്തിൽ 3 യുഎസ് സൈനികർ കൊല്ലപ്പെട്ടു. അഞ്ചുപേർക്ക് ഗുരുതരമായി പരിക്കേറ്റതായാണ് റിപ്പോർട്ടുകൾ. ഇതിനുപുറമെ ഇസ്രായേലിന് നേരെ ഇറാൻ നടത്തിയ വ്യാപകമായ ആക്രമണങ്ങളിൽ നിരവധി പേർ കൊല്ലപ്പെട്ടതായും സ്ഥിരീകരിക്കാത്ത റിപ്പോർട്ടുകളുണ്ട്.

​സംഭവത്തോട് രൂക്ഷമായാണ് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രതികരിച്ചത്. 48 ഇറാനിയൻ നേതാക്കളെ വധിച്ചതായി ട്രംപ് അവകാശപ്പെട്ടു. ലക്ഷ്യം കാണുന്നത് വരെ ഇറാനെതിരായ സൈനിക നടപടികൾ തുടരുമെന്നും ട്രംപ് വ്യക്തമാക്കി. എന്നാൽ ഇറാന്റെ പുതിയ നേതൃത്വം ചർച്ചകൾക്ക് സന്നദ്ധത പ്രകടിപ്പിച്ചിട്ടുണ്ടെന്നും സമാധാനത്തിനുള്ള സാധ്യതകൾ തേടുമെന്നും ട്രംപ് കൂട്ടിച്ചേർത്തു.

​അയത്തുള്ള അലി ഖമനൈയിയുടെ മരണം മുസ്ലീം ലോകത്തിന് നികത്താനാവാത്ത നഷ്ടമാണെന്ന് യെമനിലെ ഹൂത്തി നേതാവ് അബ്ദുൾ മാലിക് അൽ-ഹൂത്തി പറഞ്ഞു. അമേരിക്കയെയും ഇസ്രായേലിനെയും “നിന്ദ്യമായ ഭീകര രാജ്യങ്ങൾ” എന്ന് വിശേഷിപ്പിച്ച അദ്ദേഹം, ഇസ്രായേലിന്റെ പ്രാദേശിക ആധിപത്യത്തിന് തടസ്സം നിൽക്കുന്നവരെ ഇല്ലാതാക്കാനാണ് ഈ കൊലപാതകം നടത്തിയതെന്ന് ആരോപിച്ചു.

​നിലവിൽ ഇറാൻ-ഇസ്രായേൽ അതിർത്തികളിലും അമേരിക്കൻ താവളങ്ങളിലും അതീവ ജാഗ്രത തുടരുകയാണ്. ലോകരാജ്യങ്ങൾ പശ്ചിമേഷ്യയിലെ ഈ പുതിയ സംഭവവികാസങ്ങളെ ആശങ്കയോടെയാണ് ഉറ്റുനോക്കുന്നത്