വയനാട് ദുരന്തം ! സഹായം പ്രഖ്യാപിച്ച് ഗോവ ! ഗവർണർ വയനാട്ടിലേക്ക് തിരിച്ചു ; പി എസ് ശ്രീധരൻപിള്ള അടിയന്തിരമായി ദുരന്തമുഖത്തെത്തുന്നത് കേന്ദ്ര മന്ത്രിമാരുമായി നിശ്ചയിച്ച കൂടിക്കാഴ്ച നീട്ടിവച്ച് !

കേരളത്തെ ഞെട്ടിച്ച വയനാട് ഉരുൾപൊട്ടൽ നടന്ന പ്രദേശം സന്ദർശിക്കുന്നതിനും മരണമടഞ്ഞവരുടെ കുടുംബങ്ങളെയും പരിക്കേറ്റ് ചികിത്സയിലിരിക്കുന്നവരെയും ആശ്വസിപ്പിക്കുന്നതിനുമായി ഗോവ ഗവർണർ പി എസ് ശ്രീധരൻ പിള്ള വയനാട്ടിലേക്ക് തിരിച്ചു.

ദുരന്തത്തിൽപ്പെട്ടവരുടെ രക്ഷാപ്രവർത്തനത്തിലും പുനരധിവാസത്തിലും പങ്കാളികളാകാനുള്ള സന്നദ്ധത ഗോവ മുഖ്യമന്ത്രിയും ആരോഗ്യ മന്ത്രിയും പി എസ് ശ്രീധരൻപിള്ളയ്ക്ക് ഉറപ്പ് നൽകിയിട്ടുണ്ട്. ദില്ലിയിൽ കേന്ദ്ര അഭ്യന്തര,പ്രതിരോധ മന്ത്രിമാരുമായി നിശ്ചയിച്ച അദ്ദേഹത്തിന്റെ നാളത്തെ കൂടിക്കാഴ്ച മാറ്റിവച്ചു.

ബംഗാൾ ഗവർണർ ഡോ സിവി ആനന്ദബോസും ഉടൻ കേരളത്തിലെത്തും. ദില്ലിയിലെത്തി പ്രധാനമന്ത്രി നരേന്ദ്രമോദിയുമായും പ്രതിരോധമന്ത്രി രാജ്‌നാഥ്‌ സിങ്ങുമായും ആശയവിനിമയം നടത്തിയശേഷമാണ് അദ്ദേഹം കേരളത്തിലെത്തുന്നത്. രാത്രി 10 മണിയോടെ അദ്ദേഹം കോഴിക്കോട്ടെത്തുമെന്നാണ് കരുതുന്നത്. ദുരന്തവാർത്ത അറിഞ്ഞയുടൻ അദ്ദേഹം കേരളമുഖ്യമന്ത്രിയുമായി ഫോണിൽ ബന്ധപ്പെട്ട് രക്ഷാദൗത്യത്തിൽ ബംഗാൾ ജനതയുടെ ഐക്യദാർഢ്യമറിയിച്ചു. രക്ഷാപ്രവർത്തനത്തിൽ കേന്ദ്ര ഏജൻസികളുമായുള്ള ഏകോപനം സംബന്ധിച്ച് മന്ത്രി ജോർജ് കുര്യനുമായി അദ്ദേഹം കോഴിക്കോട് വച്ച് ചർച്ച ചെയ്യും.

അതേസമയം വയനാട് ഉരുള്‍പൊട്ടലിൽ 125 മരണം സ്ഥിരീകരിച്ചു. മേഖലയിൽ രക്ഷാപ്രവർത്തനം തുടരുകയാണ്. നിലവിൽ 48 പേരെ മാത്രമാണ് തിരിച്ചറിഞ്ഞിട്ടുള്ളത്. അതേസമയം ചെളിയിലും ചതുപ്പിലും ഇനിയും മൃതദേഹങ്ങൾ പുതഞ്ഞു കിടപ്പുണ്ടെന്നാണ് വിവരം. 98 പേരെ ഇനിയും കണ്ടുകിട്ടാനുണ്ട്.