കൊവിഡിനെക്കാള്‍ വിനാശകാരി; വരുന്നു പുതിയ മഹാമാരി; മുന്നറിയിപ്പുമായി ലോകാരോ​ഗ്യസംഘടന

കോവിഡിന് പിന്നാലെ മറ്റൊരു മഹാമാരി മുന്നറിയിപ്പുമായി ലോകാരോഗ്യസംഘടന. കോവിഡിനേക്കാൾ അപകടകാരിയായ മഹാമാരി ലോകത്തെ കീഴ്പ്പെടുത്തിയേക്കുമെന്നാണ് മുന്നറിയിപ്പ്. അതിവേ​ഗം പടർന്നുപിടിക്കാൻ സാധിക്കുന്ന രോ​ഗത്തിന് ഡിസീസ് എക്സ് എന്നാണ്
ലോകാരോ​ഗ്യസംഘടന നൽകിയിരിക്കുന്ന പേര്.

എക്സ് എന്നത് ആക്സ്മികമായി എന്നതിനെയാണ് സൂചിപ്പിക്കുന്നതെന്നും സംഘടന പറയുന്നു. ആഫ്രിക്കൻ രാജ്യമായ കോം​ഗോ റിപ്പബ്ലിക്കിലെ ഇൻ​ഗെൻഡെയിൽ ആദ്യ രോ​ഗിയെന്ന് സംശയിക്കുന്ന ആളെ കണ്ടെത്തി. കടുത്ത പനിയും രക്തസ്രാവവുമായാണ് ഇയാൾ ചികിത്സ തേടിയത്. ഇയാൾ നിരീക്ഷണത്തിലാണ്. ഡിസീസ് എക്സ് അതിവിനാശകാരിയാകാമെന്ന് 1976 ൽ ആദ്യമായി എബോള വൈറസ് കണ്ടുപിടിച്ച പ്രൊഫസർ ജീൻ ജാക്വസ് മുയെംബെ തംഫും മുന്നറിയിപ്പ് നൽകി. ‌ആഫ്രിക്കയിലെ ഉഷ്ണമേഖല മഴക്കാടുകൾ നിരവധി മാരകമായ വൈറസുകൾ പുറപ്പെടുവിക്കുന്നതിന്റെ ഉറവിടമാകുമെന്നും അദ്ദേഹം പറഞ്ഞു.

ജന്തുക്കളിൽ നിന്ന് തന്നെയാണ്​ ഈ രോഗവും മനുഷ്യരിലെത്തുക. കൊറോണ വൈറസിന് സമാനമായ നിരക്കിൽ ഈ രോഗം പടർന്നുപിടിക്കാമെന്നും മരണനിരക്ക് 50-90 ശതമാനം വരെയാകാമെന്നും ലോകാരോ​ഗ്യസംഘടന വ്യക്തമാക്കി. വനനശീകരണം, മൃഗങ്ങളുടെ ആവാസ വ്യവസ്ഥ തകർക്കൽ, വന്യജീവി വ്യാപാരം എന്നിവയാണ​ സമാന രോഗങ്ങളുടെ വ്യാപനത്തിനിടയാക്കുന്നതെന്നും സംഘടന മുന്നറിയിപ്പ്​ നൽകി.

എന്താണ് ഡിസീസ് എക്സ്?

2018ൽ ആരോഗ്യ അടിയന്തരാവസ്ഥകളിൽ ഗവേഷണ പഠനങ്ങൾ വേഗതയിലാക്കുന്നതിനുള്ള ഒരു ആഗോള ആക്ഷൻ പ്ലാൻ ലോകാരോഗ്യ സംഘടന പ്രസിദ്ധീകരിച്ചിരുന്നു. കോവിഡും എബോളയും ഉൾപ്പെടുന്ന ആ ലിസ്റ്റിൽ ഡിസീസ് എക്സിനെയും ഉൾപ്പെടുത്തിയിരുന്നു. നിലവിലുള്ളതല്ലാത്ത, തിരിച്ചറിയാനാകാത്ത ഒരു രോഗാണു മൂലമുള്ള ആഗോളതലത്തിൽ ബാധിച്ചേക്കാവുന്ന മാരക പകർച്ചവ്യാധി എന്ന അർഥത്തിലാണ് ഡിസീസ് എക്സിനെ ഉൾപ്പെടുത്തിയതെന്നു ലോകാരോഗ്യസംഘടന പറയുന്നു.

ഡിസീസ് എക്സിനെ പോലെ മൃഗങ്ങളിൽ നിന്നും മനുഷ്യരിലേക്ക് ഇനിയും ഒട്ടേറെ രോഗങ്ങൾ പകരാനുള്ള സാധ്യതയുണ്ടെന്നു ഗവേഷകർ പറയുന്നു. പിന്നാലെ വരുന്നവ കോവിഡ് 19 നേക്കാൾ വ്യാപനശേഷിയുമുള്ള, കൂടുതൽ മാരകമായ പകർച്ചവ്യാധികളാകാമെന്നും ഗവേഷകർ മുന്നറിയിപ്പു നൽകുന്നു.