എസ്എഫ്ഐ സംസ്ഥാന സെക്രട്ടറി പി എം ആർഷോയുടെ വിലസൽ ക്യാംപസ് മർദനക്കേസിൽ ജാമ്യമില്ലാ വാറന്‍റ് നിലനിൽക്കവേ; കണ്ടിട്ടും കാണാതെ പോലീസ്

എറണാകുളം : പൂക്കോട് റാഗിങ് കേസിൽ സംഘടനയെ ന്യായീകരിച്ച് എസ്എഫ്ഐ സംസ്ഥാന സെക്രട്ടറി പി എം ആർഷോ രംഗത്തെത്തിയത് ക്യാംപസ് മർദനക്കേസിൽ ജാമ്യമില്ലാ വാറന്‍റ് നിലനിൽക്കവേ. 2019ൽ എറണാകുളം മഹാരാജാസ് കോളജിലെ കെഎസ്‌യു പ്രവ‍ർത്തകനെ കാംപസിനുളളിലെ ഹോസ്റ്റൽ മുറിയിൽ നഞ്ചക്ക് ഉപയോഗിച്ച് ക്രൂരമായി തല്ലിച്ചതച്ച കേസിൽ ആർഷോയ്‌ക്കെതിരെ പലതവണയാണ് കോടതി ജാമ്യമില്ലാ വാറന്‍റ് പുറപ്പെടുവിച്ചത്.

കുറ്റപത്രം സമർപ്പിച്ച കേസിൽ പലതവണ വിളിപ്പിച്ചിട്ടും ഹാജരാകാത്ത ആർഷോ മുന്നിൽ വിലസി നടക്കുമ്പോൾ കാണാതെ നടിക്കുകയാണ് പോലീസ്. 2019 ഡിസംബറിലാണ്. മഹാരാജാസ് കോളേജിലെ കെ എസ് യു പ്രവർത്തകനായ അജാസിനെ ബലം പ്രയോഗിച്ച് കൊണ്ടുപോയി ഹോസ്റ്റൽ മുറിയിൽവെച്ച് മർദിച്ചത്. കേസിന്റെ പല ഘട്ടങ്ങളിലും പോലീസ് ഉഴപ്പ് നയം പുറത്തെടുത്തു. എഫ്ഐആറിൽ ആദ്യം പേര് രേഖപ്പെടുത്തിയത് പോലും തെറ്റിച്ചാണ്. പിന്നെ പേരിന് തെളിവെടുപ്പ്.

ഒടുവിൽ 2021 ൽ ആർഷോ അ‍ടക്കമുളളവരെ പ്രതിയാക്കി പൊലീസ് കുറ്റപത്രം സമർപ്പിച്ചു. തുടർ നടപടികളുടെ ഭാഗമായി എറണാകുളം ജൂഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ആ‍ർഷോയ്ക്ക് സമൻസ് അയച്ചു. പല തവണ സമൻസ് അയച്ചെങ്കിലും തിരിഞ്ഞുനോക്കിയില്ല. ഇതോടെയാണ് കോടതി ജാമ്യമില്ലാ വാറന്‍റ് പുറപ്പെടുവിച്ചത്. അർഷോയെ അറസ്റ്റ് ചെയ്ത് കോടതിയിൽ ഹാജരാക്കേണ്ട പോലീസിന് ഇപ്പോഴും നിസംഗതയാണ്. ഇതിനിടെ കാലിക്കറ്റ് യൂണിവേഴ്സിറ്റിയിൽ ഗവർണർക്കെതിരെ നടന്ന പ്രതിഷേധത്തിൽ ആർഷോയെ പോലീസ് അനുനയിപ്പിക്കാൻ ശ്രമിച്ചതും ആർഷോ പോലീസിന് നേരെ കയർത്തതും കടുത്ത വിമർശനമാണ് വിളിച്ച് വരുത്തിയത്.