രാജ്യത്തെ ഭീമൻ ഐടി കമ്പനിയായ ടാറ്റ കൺസൾട്ടൻസി സർവീസസ് (ടിസിഎസ് ) വമ്പൻ പിരിച്ചു വിടലിനു ഒരുങ്ങുന്നതായി റിപ്പോർട്ട്. രണ്ട് ശതമാനം ജീവനക്കാരെ അടുത്ത സാമ്പത്തിക വർഷത്തിൽ തന്നെ കമ്പനി പിരിച്ചു വിടുമെന്നാണ് വിവരം. വിവിധ പ്രവർത്തനങ്ങൾക്ക് ആർട്ടിഫിഷ്യൽ ഇന്റലിജൻസ് സാങ്കേതിക വിദ്യയെ ഉപയോഗിക്കുന്നതിന്റെ ഭാഗമായാണ് പുതിയ നടപടിയെന്ന് സൂചനയുണ്ട് .മിഡിൽ, സീനിയർ മാനേജ്മെന്റ് തലത്തിലുള്ള 12,200 പേർക്കാകും ജോലി നഷ്ടമാകുക .
ടിസിഎസിന് ആകെ ഏകദേശം 613,000 ജോലിക്കാരാണുള്ളത്. ഇതില് 12,200 പേര്ക്ക് വരും നാളുകളില് തൊഴില് നഷ്ടമാകും. ടഎഐയെ വിന്യസിക്കുന്നതിലൂടെ ലാഭവിഹിതം നിലനിര്ത്തുന്നതിനും വിപണിയില് മത്സരക്ഷമത തുടരുന്നതിനും കമ്പനിയുടെ ഈ നീക്കം സഹായിക്കുമെന്നാണ് വിലയിരുത്തലുകള്. കമ്പനിയുടെ സേവനങ്ങള് തടസപ്പെടാത്ത രീതിയിലായിരിക്കും ഈ തൊഴില് പുഃനക്രമീകരണം നടപ്പിലാക്കുകയെന്ന് ടിസിഎസ് ഔദ്യോഗിക പ്രസ്താവനയില് വ്യക്തമാക്കി. ഐടി രംഗത്ത് ഭാവി സുനിശ്ചിതമാക്കുന്നതിനുള്ള നടപടികള് സ്വീകരിച്ചുവരികയാണ് കമ്പനി എന്നും പ്രസ്താവനയില് ടിസിഎസ് അധികൃതര് പറയുന്നു.
283 ബില്യണ് ഡോളറിന്റെ വരുമാനമാണ് ഇന്ത്യന് ഐടി രംഗം പ്രതിവര്ഷമുണ്ടാക്കുന്നത് എന്നാണ് റിപ്പോര്ട്ട്. ഇവരിലെ ഏറ്റവും വലിയ തൊഴില്ദാതാക്കളാണ് ടാറ്റ കണ്സള്ട്ടന്സി സര്വീസസ്. ടാറ്റ ഗ്രൂപ്പിന് കീഴിലുള്ള ടിസിഎസിന്റെ ആസ്ഥാനം മുംബൈയാണ്. തൊഴില് നഷ്ടമാകുന്നവര്ക്ക് ടിസിഎസ് നഷ്ടപരിഹാരവും മറ്റ് ആനുകൂല്യങ്ങളും നല്കുമെന്ന് ദേശീയ മാധ്യമമായ ടൈംസ് ഓഫ് ഇന്ത്യയുടെ വാര്ത്തയില് പറയുന്നു. നോട്ടീസ് പീരീഡും ആനുകൂല്യങ്ങളും നല്കിയാവും തൊഴിലാളികളെ പിരിച്ചുവിടുക. ഇന്ഷൂറന്സ് കവറേജ് നീട്ടലും, കരിയര് ട്രാന്സിഷന് സഹായവും ടിസിഎസ് ഇവര്ക്ക് നല്കിയേക്കും. 600 ലാറ്ററൽ നിയമനങ്ങളുടെ ടിസിഎസ് വൈകിപ്പിച്ചതായി അടുത്തിടെ വാര്ത്തകള് പുറത്തുവന്നതിന് പിന്നാലെയാണ് പിരിച്ചുവിടല് സ്ഥിരീകരണവും വന്നിരിക്കുന്നത് എന്നത് ശ്രദ്ധേയമാണ്. വരുംകാല സാങ്കേതികവിദ്യകളില് കൂടുതല് നിക്ഷേപം നടത്താനും എഐയെ ആഭ്യന്തര, ഉപഭോക്തൃ പ്രവര്ത്തനങ്ങളില് കൂടുതലായി ഉപയോഗിക്കാനുമാണ് ടിസിഎസിന്റെ തീരുമാനം.
