ഇന്ധന സെസില്‍ മാറ്റമുണ്ടാകുമോ?;മാറ്റമുണ്ടെങ്കിൽ ധനമന്ത്രി നാളെ നിയമസഭയില്‍ പ്രഖ്യാപിക്കും;ഇളവുകളുണ്ടാകില്ലെന്ന് സൂചന നല്‍കി മുഖ്യമന്ത്രി

തിരുവനന്തപുരം : ബജറ്റില്‍ പ്രഖ്യാപിച്ച ലിറ്ററിന് 2 രൂപ എന്ന പുതിയ ഇന്ധന സെസില്‍ മാറ്റം വരുമെങ്കില്‍ ധനമന്ത്രി നാളെ നിയമസഭയില്‍ പ്രഖ്യാപിക്കും. സാധാരണയായി ബജറ്റ് പാസാക്കുന്നതിനു മുന്നോടിയായുള്ള മറുപടി പ്രസംഗത്തിലാണു ബജറ്റിലെ ഒഴിവാക്കലുകളും കൂട്ടിചേര്‍ക്കലുകളും ധനമന്ത്രി പ്രഖ്യാപിക്കുക. എന്നാൽ ഇന്ധന സെസില്‍നിന്നു ഇളവുകളൊന്നുമുണ്ടാകില്ലെന്ന സൂചനയാണ് എല്‍ഡിഎഫ് നിയമസഭാകക്ഷി യോഗത്തില്‍ മുഖ്യമന്ത്രി നൽകുന്നത്. സെസ് സംസ്ഥാനത്തിന് അനിവാര്യമാണെന്നായിരുന്നു മുഖ്യമന്ത്രിയുടെ വാദം .

പ്രതിപക്ഷം നിയമസഭയ്ക്ക് അകത്തും പുറത്തും സെസ് വർധനയിൽ പ്രതിഷേധിച്ചുള്ള സമരം ശക്തമാക്കിയതോടെ പ്രതിപക്ഷ ആവശ്യങ്ങൾക്ക് വഴങ്ങരുത് എന്ന നിലപാടിലേക്കു സര്‍ക്കാരും മുന്നണിയും എത്തിയതായാണു സൂചന. ഇന്ധന സെസിനെതിരെ ജനകീയ പ്രതിഷേധമില്ലെന്നും മറിച്ച് രാഷ്ട്രീയ പ്രതിഷേധം മാത്രമാണെന്നും എല്‍ഡിഎഫ് നേതാക്കളുടെ ന്യായീകരണം.