വനിതാ സംവരണ ബിൽ : ‘നീട്ടിവെക്കൽ രാഷ്ട്രീയം’ വേണ്ടെന്ന് കേന്ദ്രം; മല്ലികാർജുന ഖർഗെയുടെ ആരോപണങ്ങൾക്ക് മറുപടിയുമായി കിരൺ റിജിജു

ദില്ലി : വനിതാ സംവരണ ഭേദഗതി നിയമം നടപ്പാക്കുന്നതുമായി ബന്ധപ്പെട്ട് കോൺഗ്രസ് ഉന്നയിച്ച ആരോപണങ്ങൾക്ക് ശക്തമായ മറുപടിയുമായി കേന്ദ്ര സർക്കാർ. ബില്ലിന് പിന്നിൽ മതിയായ മുന്നൊരുക്കങ്ങളില്ലെന്ന എഐസിസി അദ്ധ്യക്ഷൻ മല്ലികാർജുന ഖർഗെയുടെ വിമർശനം തള്ളിയ കേന്ദ്രമന്ത്രി കിരൺ റിജിജു, വിഷയത്തിൽ ‘നീട്ടിവെക്കൽ രാഷ്ട്രീയം’ പാടില്ലെന്ന് വ്യക്തമാക്കി. ഖർഗെയ്ക്ക് അയച്ച വിശദമായ കത്തിലൂടെയാണ് കേന്ദ്രസർക്കാർ വസ്തുതകൾ നിരത്തി തങ്ങളുടെ നിലപാട് വ്യക്തമാക്കിയത്.

പതിറ്റാണ്ടുകളായി ഇന്ത്യൻ സ്ത്രീകൾ കാത്തിരിക്കുന്ന സംവരണം യാഥാർത്ഥ്യമാക്കേണ്ട സമയമാണിതെന്ന് കേന്ദ്രം കത്തിൽ ചൂണ്ടിക്കാട്ടി. 2029-ഓടെ വനിതാ സംവരണം പൂർണ്ണതോതിൽ നടപ്പിലാക്കാൻ മണ്ഡല പുനർനിർണ്ണയ നടപടികൾ അനിവാര്യമാണെന്നും സർക്കാർ വിശദീകരിച്ചു. കേവലം നടപടിക്രമങ്ങളുടെ പേര് പറഞ്ഞ് സംവരണം ഇനിയും വൈകിക്കുന്നത് രാജ്യത്തെ സ്ത്രീകൾക്ക് ലഭിക്കേണ്ട നീതി നിഷേധിക്കുന്നതിന് തുല്യമാണ്. ഇത് രാഷ്ട്രീയമായ ഒരു നീക്കമല്ലെന്നും, മറിച്ച് രാജ്യത്തെ പുത്രിമാർക്ക് നൽകിയ ഉറപ്പ് പാലിക്കലാണെന്നും കേന്ദ്ര സർക്കാർ കത്തിൽ ഉറപ്പിച്ചു പറഞ്ഞു.

ബില്ലുമായി ബന്ധപ്പെട്ട് പ്രതിപക്ഷവുമായി ചർച്ചകൾ നടത്തിയിട്ടില്ലെന്ന ആരോപണവും കേന്ദ്രം പൂർണ്ണമായും നിഷേധിച്ചു. പ്രതിപക്ഷ നേതാക്കളുമായി നിരന്തരം ചർച്ചകൾ നടന്നിട്ടുണ്ടെന്നും സംവാദങ്ങൾ ഇപ്പോഴും തുടരുകയാണെന്നും സർക്കാർ വ്യക്തമാക്കി. എന്നാൽ ചർച്ചകളിൽ മാത്രം ഒതുങ്ങിനിൽക്കാതെ തീരുമാനങ്ങളെടുക്കാനും അത് പ്രവൃത്തിപഥത്തിൽ എത്തിക്കാനുമുള്ള സമയമാണിതെന്ന് കേന്ദ്രം ഓർമ്മിപ്പിച്ചു. ‘നാരി ശക്തി വന്ദൻ അധിനിയം’ നടപ്പാക്കുന്നതിൽ എല്ലാ കക്ഷികളുടെയും പിന്തുണ തേടി പ്രധാനമന്ത്രി നരേന്ദ്ര മോദി പാർലമെന്റിലെ വിവിധ കക്ഷി നേതാക്കൾക്ക് കത്തയച്ചിട്ടുണ്ട്. സ്ത്രീ ശാക്തീകരണത്തിനായുള്ള ഈ ചുവടുവെപ്പിനെ കക്ഷിരാഷ്ട്രീയത്തിന് അതീതമായി കാണണമെന്നും അദ്ദേഹം അഭ്യർത്ഥിച്ചു.

ഏപ്രിൽ 16 മുതൽ 18 വരെ പാർലമെന്റിൽ ഇതുസംബന്ധിച്ച ചരിത്രപരമായ ചർച്ചകൾ നടക്കാനിരിക്കുകയാണ്. ഈ ദിവസങ്ങളിൽ ഇരുസഭകളിലും ഹാജരാകാൻ ബിജെപി തങ്ങളുടെ എംപിമാർക്ക് ത്രിലൈൻ വിപ്പ് നൽകിയിട്ടുണ്ട്. 2023 സെപ്റ്റംബറിൽ ഇരുസഭകളും പാസാക്കിയ 106-ാമത് ഭരണഘടനാ ഭേദഗതി നിയമം (നാരി ശക്തി വന്ദൻ അധിനിയം) രാജ്യത്തെ സ്ത്രീകളുടെ രാഷ്ട്രീയ പ്രാതിനിധ്യത്തിൽ നിർണ്ണായക മാറ്റങ്ങൾ കൊണ്ടുവരുമെന്നാണ് പ്രതീക്ഷിക്കുന്നത്.