കോട്ടയം: കൊറോണ വൈറസ് പടരുന്ന പശ്ചാത്തലത്തിൽ സമൂഹ വ്യാപനം തടയുന്നതിനുള്ള മുന്കരുതല് നടപടികളുടെ ഭാഗമായി കോട്ടയം ജില്ലയില് നിരോധനാജ്ഞ പ്രഖ്യാപിച്ചു.ജില്ലാ കളക്ടര് പി.കെ. സുധീര് ബാബു സിആര്പിസി സെക്ഷന് 144 പ്രകാരമാണ് നിരോധനാജ്ഞ പ്രഖ്യാപിച്ചത്. ഇന്ന് രാവിലെ ആറു മുതലാണ് നിരോധനാജ്ഞ പ്രാബല്യത്തില് വരിക.ഉത്തരവ് നടപ്പാക്കാനും ലംഘിക്കുന്നവര്ക്കെതിരെ അടിയന്തരമായി കര്ശന നടപടി സ്വീകരിക്കാനും ജില്ലാ പോലീസ് മേധാവിയെ ചുമതലപ്പെടുത്തി. ജില്ലയുടെ പരിധിയില് വരുന്ന പ്രദേശങ്ങളില് നാലു പേരില് കൂടുതല് ഒത്തുചേരുന്നതിന് നിരോധനമുണ്ട്.
അതേസമയം, സര്ക്കാര് പ്രഖ്യാപിച്ചിട്ടുള്ള അവശ്യ സര്വീസുകളെ നിരോധനത്തില് നിന്ന് ഒഴിവാക്കിയിട്ടുണ്ടെന്നും ഉത്തരവില് പറയുന്നു.കൊറോണ മുന്കരുതല് നടപടികള്ക്ക് വിരുദ്ധമായി ജനങ്ങള് നിയമവിരുദ്ധമായി കൂട്ടം കൂടുന്നതായി ജില്ലാ പോലീസ് മേധാവിയും കോട്ടയം, പാലാ സബ് ഡിവിഷണല് മജിസ്ട്രേറ്റുമാരും റിപ്പോര്ട്ട് ചെയ്തിരുന്നു. ഇതിന്റെ പശ്ചാത്തലത്തിലാണ് ജില്ലയില് നിരോധനാജ്ഞ ഏര്പ്പെടുത്തിയത്.