കോവിഡ്: ഐശ്വര്യാറായിയും മകളും ആശുപത്രിയിൽ

മുംബൈ :കോവിഡിനെ തുടർന്ന് വീട്ടിൽ നിരീക്ഷണത്തിൽ കഴിഞ്ഞിരുന്ന നടി ഐശ്വര്യ റായ് ബച്ചനെയും മകള്‍ ആരാധ്യയെയും ആശുപത്രിയില്‍ പ്രവേശിപ്പിച്ചു. മുംബൈയിലെ നാനാവതി ആശുപത്രിയിലാണ് ഇരുവരെയും പ്രവേശിപ്പിച്ചത് . വീട്ടിൽ നിരീക്ഷണത്തിൽ കഴിഞ്ഞിരുന്ന ഇരുവർക്കും ശ്വാസംമുട്ടല്‍ അനുഭവപ്പെട്ടതോടെയാണ് ആശുപത്രിയില്‍ പ്രവേശിപ്പിച്ചത്. അതേസമയം,
ഇരുവരുടെയും ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചുനേരത്തെ കോവിഡ് സ്ഥിരീകരിച്ച ഐശ്വര്യയുടെ ഭർത്താവ് അഭിഷേക് ബച്ചൻ അദ്ദേഹത്തിന്‍റെ അച്ഛൻ അമിതാഭ് ബച്ചൻ എന്നിവരെ ഇതിനകം തന്നെ അതേ ആശുപത്രിയിൽ പ്രവേശിപ്പിച്ചിട്ടുണ്ട്.

ജൂലൈ 11നാണ് 77 കാരനായ അമിതാഭ് ബച്ചനെ ആശുപത്രിയിൽ പ്രവേശിപ്പിച്ചിത്. ബച്ചൻ തന്നെയാണ് ഇക്കാര്യം ട്വിറ്ററിലൂടെ അറിയിച്ചത്. ‘കോവിഡ് സ്ഥിരീകരിച്ച എന്നെ ആശുപത്രിയിലേക്ക് മാറ്റി, കുടുംബവും ഉദ്യോഗസ്ഥരും പരിശോധനയ്ക്ക് വിധേയമായി, ഫലങ്ങൾ കാത്തിരിക്കുന്നുവെന്ന് ” അദ്ദേഹം ട്വീറ്റിലൂടെ അറിയിച്ചിരുന്നു.

പിന്നീട് അദ്ദേഹത്തിന്റെ മകൻ അഭിഷേക് ബച്ചനും പോസിറ്റീവ് സ്ഥിരീകരിച്ചു. അതിന് പിന്നാലെയാണ് ഐശ്വര്യറായ് ബച്ചനും മകൾ ആരാധ്യയ്ക്കും രോഗം സ്ഥിരീകരിച്ചത്. വലിയതോതിലുള്ള ലക്ഷണങ്ങളില്ലാത്തതിനാൽ ഐശ്വര്യയെയും മകളെയും വീട്ടിൽ നിരീക്ഷണത്തിലാക്കുകയായിരുന്നു.